"ოჯახები ინგრევა და ცოლ-ქმარი სცილდება ერთმანეთს, რა გახდა ახლა, პოლიტიკაში ჩვეულებრივი ამბავია", — ასე გამოეხმაურა ქართული ოცნების დეპუტატი, გია ვოლსკი პარტიიდან ბიძინა გეგიძის შესაძლო წასვლას. მისივე თქმით, თუ პოზიციები ერთმანეთს არ ემთხვევა ორი სუბიექტი ერთმანეთს უნდა დასცილდეს.

გია ვოლსკი აცხადებს, რომ ბიძინა გეგიძის რამდენიმე გადაწყვეტილება და განცხადება, მათ შორის შინაგან საქმეთა მინისტრ გიორგი გახარიასთან დაკავშირებით არასწორი იყო:

"არასწორი იყო მისი გადაწყვეტილება, არც [ნიკა] მელიასთან დაკავშირებით და არც [გიორგი] გახარიასთან დაკავშირებით არ იყო სწორი. მეორე, თუკი რაიმე საქმე აღიძრა შარშან აგვისტოში, ამის თაობაზე უნდა გაეკეთებინა განცხადება, ვინაიდან ამას ავალდებულებს დეპუტატის მანდატი".

მმართველი გუნდის პარლამენტარი ბიძინა გეგიძე სახელმწიფო უსაფრთხოების სამსახურში გამოკითხვაზე დაიბარეს. გეგიძე ანტიკორუფციული სააგენტოს მიერ მის წინააღმდეგ დაწყებულ გამოძიებას პოლიტიკურ საქმიანობას უკავშირებს. ამასთანავე, გეგიძე ამბობს, რომ ქართული ოცნებიდან წავა, თუ უზენაესის მოსამართლეობის კანდიდატების ახალი სია არ მოეწონება.

ბიძინა გეგიძე ანტიკორუფციულ სააგენტოში გამოკითხვაზე დღეს, 19 აგვისტოს 11 საათზე იყო დაბარებული, თუმცა არ მისულა. მისი თქმით, სუსი ამის შესახებ ინფორმირებული იყო და გამოკითხვაზე სხვა დროს მივა.

უწყებაში განმარტავენ, რომ გამოძიება 2018 წლის 2 აგვისტოდან მიმდინარეობს და გეგიძის წინა სამსახურებრივ საქმიანობას უკავშირდება. უწყება არ აკონკრეტებს რომელს. მათი თქმით, გეგიძე დაკითხვაზე მოწმის სახითაა დაბარებული.