პერსეიდების წვიმა ერთ-ერთი ყველაზე პოპულარული ასტრონომიული მოვლენაა, რომელიც ყოველწლიურად აგვისტოს თვეში ხდება. მეტეორული წვიმა პიკს 12-13 აგვისტოს აღწევს. ამ პერიოდში საათში რამდენიმე ათეული, ზოგჯერ კი ასეული მეტეორის დანახვაცაა შესაძლებელი.

ხილვადობაზე გავლენა, რა თქმა უნდა, მთვარესაც აქვს. 2019 წელს, სამწუხაროდ, მთვარე 12-13 აგვისტოს ცას მნიშვნელოვნად გაანათებს (სავსე მთვარე 15 აგვისტოს ემთხვევა), რაც მეტეორებს ნაწილობრივ დაჩრდილავს.

ფოტო: David Kingham/Flickr

მეტეორების დანახვა ქალაქიდან სინათლის დაბინძურების გამო გაგიჭირდებათ. ამიტომ უმჯობესია, რომ 12-13 აგვისტოს ქალაქგარეთ, სინათლისგან მოშორებულ ადგილას მოხვდეთ. მთვარის მიუხედავად, თუ საკმარისად ბნელ ადგილას აღმოჩნდებით მეტეორებზე დაკვირვებას უპრობლემოდ შეძლებთ.

მეტეორების მაქსიმალური რაოდენობა 13 აგვისტოს, გამთენიამდეა მოსალოდნელი.

წვიმა კომეტა Swift-Tuttle-ითაა გამოწვეული, რომელიც მზის გარშემო 133-წლიან ორბიტაზე მოძრაობს და უკან პატარა მეტეორების კვალს ტოვებს. ყოველ აგვისტოს დედამიწა Swift-Tuttle-ის კვალს კვეთს. ამ დროს მეტეორები დედამიწის ატმოსფეროში შემოდიან და ფერადად იწვიან.