კონკურენციის სააგენტო მერვე თვეა იკვლევს, რა მიზეზით გაიზარდა საქართველოში პურის ფასი გასული წლის დეკემბერში. რვა თვის განმავლობაში შეუსრულებელი დავალება სააგენტოს პრემიერ-მინისტრმა, მამუკა ბახტაძემ 2018 წლის 10 დეკემბერს მისცა.

"ამ ეტაპზე მონიტორინგი მიმდინარეობს... როგორც კი გვექნება პასუხი, გაგაგებინებთ", — უთხრეს On.ge-ს სააგენტოში.

On.ge მარტში, აპრილში, მაისში, ივნისსა და ივლისშიც დაინტერესდა, რა ეტაპზე იყო პურის გაზრდის მიზეზების დადგენის საკითხი. სააგენტოს პასუხი არ შეცვლილა.

გასული წლის 10 დეკემბრიდან მაღაზიებში პურის ფასმა, დაახლოებით, 5-10 თეთრით მოიმატა. მთავრობის სხდომის დაწყების წინ პრემიერმა აღნიშნა, რომ ეს შეიძლება, დაკავშირებული იყოს არასამართლიან კონკურენციასთან.

"მინდა შესაბამის ორგანოებს მივმართო, რომ უმოკლეს ვადებში შეისწავლონ ეს სიტუაცია და მოამზადონ ანგარიში, თუ რასთან გვაქვს საქმე. საქართველო არის საბაზრო ეკონომიკა, ჩვენ ვართ ღია ეკონომიკა, მაგრამ არასამართლიანი კონკურენციის კეთების საშუალებას ვერავის მივცემთ", — აღნიშნა მაშინ მამუკა ბახტაძემ.

ამავე თემაზე: რა ვიცით კონკურენციის სააგენტოზე, რომელმაც პურის ფასის ზდრის მიზეზი 8 თვე ვერ დაადგინა