შინაგან საქმეთა სამინისტროს ცნობით, ოჯახში ძალადობისა და დიდი ოდენობით ნარკოტიკული საშუალების უკანონო შეძენა-შენახვის ბრალდებით, ერთი პირი დააკავეს.ბრალდებულს 5-დან 8 წლამდე ვადით თავისუფლების აღკვეთა ემუქრება.

უწყების ცნობით, ბრალდებული ცოლს სისტემატურად აყენებდა სიტყვიერ და ფიზიკურ შეურაცხყოფას. სამართალდამცველებმა ბრალდებული მოსამართლის განჩინების საფუძველზე დააკავეს.

"პოლიციამ დაკავებულის პირადი ჩხრეკისას ნივთმტკიცებად ამოიღო ნარკოტიკული საშუალება სუბუტექსის 5 აბი", — ნათქვამია შსს-ს განცხადებაში.

გამოძიება ოჯახში ძალადობისა და დიდი ოდენობით ნარკოტიკული საშუალების უკანონო შეძენა-შენახვის საქმეზე საქართველოს სისხლის სამართლის კოდექსის 126-ე პრიმა მუხლის 1-ლი ნაწილით და 260-ე მუხლის მე-3 ნაწილის ა ქვეპუნქტით მიმდინარეობს.