ერგნეთში ატისაოკუპაციო აქცია იმართება. საოკუპაციო ხაზთან შეკრებილი მოქალაქეები, მშვიდობიანად აპროტესტებენ აგვისტოს ომიდან მე-11 წლისთავს.

აქციის ორგანიზატორები ამბობენ, რომ მათ ახსოვთ 2008 წლის 7 აგვისტო, როცა რუსეთმა ომი დაიწყო და სურთ კიდევ ერთხელ უთხრან არა რუსულ ოკუპაციას. "ჩვენ გვახსოვს აგვისტოს ომი, ჩვენ გვტკივა და არ დავივიწყებთ გმირებს!" — ამბობენ ორგანიზატორები. აქციაზე ასევე არიან პოლიტიკური პარტიების წარმომადგენლები. ევროპული საქართველოს ლიდერის, დავით ბაქრაძის თქმით, რუსეთთან ურთიერთობას მანამდე ვერ ავაწყობთ, სანამ არ შეწყვეტს საქართველოს ოკუპაციას და არ დატოვებს ჩვენს ტერიტორიებს.

ფოტო: გვანცა ნემსაძე / On.ge

ერგნეთი ოკუპირებული ცხინვალიდან 500 მეტრით დაშორებული სოფელია. ის 2008 წლის ომის დროს მნიშვნელოვნად დაზარალდა, სახლების უმეტესობა დაიბომბა და დაიწვა. 2008 წლის რუსეთ-საქართველოს ომს ოკუპირებული რეჟიმი დღემდე "ქართულ აგრესიას" უწოდებს და სხვადასხვა სახის დეზინფორმაციას ავრცელებს იმის შესახებ, რომ ქართული ჯარები მშვიდობიან მოსახლეობას ბომბავდა და ომი საქართველომ დაიწყო.