ისრაელის მიერ გაშვებული ხომალდი Beresheet მთვარის ზედაპირზე 11 აპრილს წარუმატებლად დაეშვა. საინტერესო კი ისაა, რომ მას მთვარის ზედაპირზე, შესაძლოა, ნამსხვრევების გარდა ცოცხალი ორგანიზმებიც დაეტოვებინა. Beresheet-ს ბორტზე ათასობით ნელამავალი (Tardigrade) იყო, რომელსაც სხვაგვარად წყლის დათვებადაც მოიხსენიებენ ხოლმე.

რატომაა ეს მნიშვნელოვანი? იმიტომ, რომ წყლის დათვები ადამიანისთვის ცნობილი ყველაზე გამძლე ორგანიზმები არიან. წყლის დათვები დედამიწის ორბიტაზე არსებულ მკაცრ პირობებსაც უმკლავდებიან. 2007 წელს ევროპის კოსმოსურმა სააგენტომ ჩაატარა ექსპერიმენტი, რა დროსაც მათ დედამიწის ორბიტაზე წყლის დათვები 10 დღით გაუშვეს. ხომალდის დედამიწაზე დაბრუნების შემდეგ, მეცნიერების გასაკვირად, მათ წყლის დათვების ნაწილის გაცოცხლება შეძლეს.

სხვა სიტყვებით რომ ვთქვათ, ახლა მთვარის ზედაპირზე, შესაძლოა, წყლის დათვები, ანუ სიცოცხლე არსებობდეს.

მიუხედავად ამისა, აღსანიშნავია, რომ მთვარეზე მოფუსფუსე წყლის დათვებს არ უნდა ველოდოთ. ორგანიზმების გაშვებამდე ისინი მეცნიერებმა წინასწარ გამოაშრეს, თუმცა წყლის დათვების გამოცოცხლება წყლის საშუალებით წლების შემდეგაც შესაძლებელია.

Beresheet-ზე არსებული კონტეინერი, რომელშიც ათასობით წყლის დათვია მოთავსებული, დიდი ალბათობით, ახლა მთვარის ზედაპირზე გდია. წყლის დათვები განსაკუთრებით გამძლე ორგანიზმები არიან, თუმცა რამდენი ხნით შეიძლება შეინარჩუნონ დათვებმა მთვარის მკაცრ პირობებში სიცოცხლისუნარიანობას, უცნობია.