პრეზიდენტის, სალომე ზურაბიშვილის ადმინისტრაციის ყოფილი ხელმძღვანელი ლაშა ჟვანია ისრაელში საქართველოს ელჩად დაინიშნა. მანამდე ჟვანია პატრიარქის ფონდს ხელმძღვანელობდა.

როგორც საგარეო საქმეთა სამინისტრო წერს, ჟვანია 1995 წლიდან სხვადასხვა პოზიციებზე საქმიანობდა საქართველოს დიპლომატიურ სამსახურში. მათ შორის 2004 წელს იყო საგარეო საქმეთა სამინისტროში მინისტრის მოადგილე, ხოლო 2005-2008 წლებში ისრაელსა და კვიპროსში საქართველოს საგანგებო და სრულუფლებიანი ელჩი.

ლაშა ჟვანია პრეზიდენტის ადმინისტრაციას 2018 წლის დეკემბრიდან 2019 წლის მაისამდე ხელმძღვანელობდა. მანამდე, 2010 წლიდან დღემდე არის პატრიარქ ილია მეორეს კულტურის, მეცნიერებისა და სულიერების აღორძინებისა და განვითარების საერთაშორისო ფონდის მთავარი მენეჯერი.

ამასთანავე, ჟვანია 2008-2009 წლებში იყო საქართველოს ეკონომიკური განვითარების მინისტრი. 2002-2003 წლებში საქართველოს ფინანსთა მინისტრის მოადგილის პოსტს იკავებდა, ხოლო 2002-2003 წლებში ანტიკორუფციული საბჭოს წევრი იყო.

2008 წელს საქართველოს პარლამენტის წევრი იყო და საგარეო ურთიერთობათა კომიტეტის თავმჯდომარე. 2004 წელს მინიჭებული აქვს საგანგებო და სრულუფლებიანი ელჩის დიპლომატიური რანგი.

ამასთანავე, თეა კატუკია საფრანგეთში საქართველოს ელჩად და UNESCO-ში მუდმივ წარმომადგენლად დაინიშნა. თეა კატუკია 2012 წლიდან დღემდე იყო ერთ-ერთი უმთავრესი ფრანგული კვლევითი ცენტრის — საერთაშორისო საფრთხეების პრევენციისა და ანალიზის ფრანგული კვლევითი გენერალური მდივანი.