შავი ზღვა ხმელთაშუა ზღვასთან შედარებით ორჯერ მეტადაა დაბინძურებული. ამის შესახებ ევროკავშირის დელეგაციამ უკრაინაში განაცხადა.

საქართველოს, უკრაინის, რუსეთის ღია ზღვის სანაპირო წყლებში 2017 წლიდან ჩატარებული კვლევების საფუძველზე ევროკავშირის ამბობს, რომ წყლის დამაბინძურებლების 83 პროცენტი პლასტმასია: "ბოთლები, ტკბილეულის შესახვევები და ჩანთები".

უკრაინის მსხვილ მდინარეებს ზღვაში საათში 5-დან 50 ერთეული ნაგავი ჩააქვს. ჯამში, შავ ზღვაში ყოველ კვადრატულ კილომეტრზე 90,5 ერთეული ნაგავია. ხმელთაშუა ზღვაში კი ეს მაჩვენებელი 50 ერთეულია.

ევროკავშირის ცნობით, ზოგიერთი ქიმიური ნივთიერება, რომელიც ზღვაში აღმოაჩინეს, ზღვის ბინადრებისა და ადამიანის სიცოცხლისთვის საშიშია.

ამ ნივთიერებებს შორისაა ბენზოაპირენი, პესტიციდები და ინსეკტიციდები, რომელიც საშიშია ცხოველებისა და ადამიანის სიცოცხლისათვის.

ამავე კვლევით, ყველა სახეობის დელფინების პოპულაცია, რომლებიც შავ ზღვაში დაცურავენ, "შედარებით დაბალია".

ევროკავშირის შავი ზღვის მონიტორინგის პროექტი 2020 წლამდე გრძელდება და მისი ბიუჯეტი 1,6 მილიონი ევროა.