ახალგორელ აქტივისტს, თამარ მეარაყიშვილს დე-ფაქტო სამხრეთ ოსეთში სასამართლომ ყველა ბრალდება მოუხსნა. სასამართლო გადაწყვეტილებით აქტივისტს გაუუქმდა გადაადგილების შეზღუდვაც. ინფორმაციას ამის შესახებ მედია და თავად მეარაყიშვილი ავრცელებს.

ეხო კავკაზა წერს, რომ მოსამართლე ფატიმა პარასტაევამ პროკურატურის აღძრულ საქმეებში ვერც დანაშაულის ჩადენის დრო და ადგილი და ვერც დანაშაულის ნიშნები დაიანახა.

თამარ მეარაყიშვილის საქმე

თამარ მეარაყიშვილის მიმართ სამხრეთ ოსეთის დე ფაქტო რესპუბლიკის პროკურატურამ რიგით მეორე სისხლის სამართლის საქმე მარტში აღძრა. საქმე აღიძრა მუხლით, რომელიც ოფიციალური დოკუმენტების, ჯილდოების, ბეჭდის, შტამპის, ბლანკის გაყალბებას ითვალისწინებს. პროკურატურა მას დე-ფაქტო სამხრეთ ოსეთის მოქალაქის ყალბი პასპორტის დამზადებას ედავებოდა.

მეარაყიშვილი 2017 წლის 16 აგვისტოს დააკავეს დე ფაქტო სამხრეთ ოსეთის მმართველი პოლიტიკური პარტიის ედინაია ოსეტიას მიმართ ცილისწამების ბრალდებით. მას შემდეგ ოთხი სასამართლო პროცესი ჩატარდა ცხინვალში, ბრალდებულის სახლი არაერთგზის გაიჩხრიკა, არაერთი დაკითხვა ჩატარდა, თუმცა გამოძიებამ მაინც ვერ შეძლო საკმარისი მტკიცებულების მოპოვება იმის დასამტკიცებლად, რომ მეარაყიშვილი დამნაშავეა.

თამარს ყველანაირი დოკუმენტი აქვს ჩამორთმეული და გადაადგილების უფლება შეზღუდული. მთელ დროს ის ახალგორში, საკუთარ სახლში ატარებს და გარეთ გასვლას მხოლოდ სასამართლო პროცესზე ან დაკითხვაზე წასვლის შემთხვევაში ახერხებს, ისიც ადვოკატის თანხლებით.