ამერიკელი სენატორი ჩაკ შუმერი რუსეთში შექმნილი აპლიკაციის, FaceApp-ის გამოძიებას ფედერალური ბიუროსგან ითხოვს. აპლიკაცია მომხმარებლებს გარეგნობას ან ასაკს უცვლის.

ტვიტერზე გამოქვეყნებულ წერილში, შუმერი FaceApp-ს "შემაწუხებელს" უწოდებს და შიშობს, რომ მისი საშუალებით ამერიკის მოქალაქეების პირადი ინფორმაცია შესაძლოა მტრულად განწყობილი ქვეყნის ხელში აღმოჩნდეს.

2017 წელს შექმნილი აპლიკაცია მომხმარებლების სურათებს ხელოვნური ინტელექტის საშუალებით "აბერებს" და დაახლოებით 40-50 წელს ჰმატებს. ის გასული კვირის წინ ხელმეორედ გავირუსდა, რის შემდეგაც კონფიდენციალური ინფორმაციის დაცულობაზე კითხვები გააჩინა. FaceApp მის მიმართ არსებულ პრეტენზიებს უსაფუძვლოს უწოდებს.

"იმის მიუხედავად, რომ დეველოპერთა გუნდი რუსეთში მოღვაწეობს, მომხმარებელთა ინფორმაცია რუსეთს არ გადაეცემა", — აცხადებს კომპანია.

სენატორის განცხადებამდე, დემოკრატების ეროვნულმა კომიტეტმა 2020 წლის საპრეზიდენტო არჩევნების კანდიდატებსა და მათი კამპანიის თანამშრომლებს მოუწოდა, აპლიკაცია არ გამოეყენებინათ:

"უცნობია რა უსაფრთხოების რისკებს შეიცავს [FaceApp], მაგრამ აშკარაა, რომ რისკების თავიდან არიდებით სარგებელს მიიღებთ".

FaceApp-ს ამ დროისთვის 80 მილიონი აქტიური მომხმარებელი ჰყავს.

ამავე თემაზე: