ნიკა გვარამიას განცხადებით შალვა რამიშვილს დიდი ხნის განმავლობაში ჰქონდა მათთან კომუნიკაცია და როგორც თავად ამბობს, იგი რუსთავი 2-ს "ფასიან მომსახურებას" სთავაზობდა ქართული ოცნების წინააღმდეგ.

გვარამია ასევე აცხადებს, რომ ასეთივე შეთავაზებით მივიდა მათთან ელისო კილაძეც, რომელიც ისევე როგორც შალვა რამიშვილი, უარით გაისტუმრეს.

ამის შესახებ რუსთავი 2-ის გენერალურმა დირექტორმა დღეს, 3 სექტემბერს გამართულ ბრიფინგზე ისაუბრა.

შალვა რამიშვილის განცხადებასთან დაკავშირებით, ნიკა გვარამია უარყოფს, რომ ეგზიტპოლები შეიძლება გაყალბდეს:

"მე არ ვიცი მისი დოკუმენტები რას ადასტურებს. მე რეზულტატები მომდის მხოლოდ მაილით, და იგი ქვეყნდება მომდევნო დღეს. მე არ მესმის რატომ არის ამ ეგზიტპოლების მნიშვნელობის ასეთი გადაჭარბებული შეფასება. თუ ეს ეგზიტპოლები იქნება ყალბი, ზუსტად ნახევარ დღეში გვეცოდინება ცესკოს შედეგები".

ჟურნალისტი შალვა რამიშვილი აცხადებს, რომ საზოგადოებრივი აზრის კვლევები, რომელსაც რუსთავი 2 VCG-სა და GFK-ზე დაყრდნობით ასაჯაროებს, გაყალბებულია და კვლევის რეალურ შედეგებს არ ასახავს. მისი თქმით, არხის მიერ გამოქვეყნებული კვლევის შედეგები რამდენიმე პარტიასთან, მათ შორის ენმ-სთან მიმართებით, გაყალბებულია.