ექსპრეზიდენტი მიხეილ სააკაშვილი რუსთავი 2-ის საქმეზე სტრასბურგის სასამართლოს გადაწყვეტილებას გამოეხმაურა და მხარდამჭერებს მობილიზებისკენ მოუწოდა. მისი თქმით, ქართული ოცნების თავმჯდომარე ბიძინა ივანიშვილმა ჯერ მთელი ქვეყანა, ახლა კი რუსთავი 2 ჩაიგდო ხელში, ამიტომ წინააღმდეგობაა საჭირო.

"ახლა არის საგანგებო სიტუაცია. ქვეყანა, საბოლოოდ, იკარგება. მოდით, გვერდზე გადავდოთ შვებულებები, დასვენებები, კარგი ცხოვრება, ჩვენი გეგმები და დავაყენოთ სამშობლო ჩვენზე მაღლა", — ამბობს სააკაშვილი ვიდეომიმართვაში.

გარდა ამისა, მან ისევ მოუწოდა პოლიტიკურ პარტიებს გაერთიანდნენ და "ბოლომდე მიიყვანონ" ბრძოლა "საქართველოს გადასარჩენად". კერძოდ, სააკაშვილი ამბობს, რომ უნდა მიაღწიონ რიგგარეშე საპარლამენტო არჩევნებს და "ივანიშვილი მოაშორონ ქვეყანას".

ადამიანის უფლებათა ევროპულმა სასამართლომ რუსთავი 2-ის საქმეზე ადამიანის უფლებათა ევროპული კონვენციის არც ერთი მუხლის დარღვევა არ დაადგინა. სტრასბურგის სასამართლომ ამ გადაწყვეტილებით თქვა, რომ რუსთავი 2 ქიბარ ხალვაშს ეკუთვნის და საქართველოს სამი ინსტანციის სასამართლოს მიერ მიღებული გადაწყვეტილებები კანონიერია.

ამავე გადაწყვეტილებით, სტრასბურგის სასამართლომ აღარ დატოვა ძალაში აღსრულების დროებითი შეჩერების მექანიზმი. ამით ქიბარ ხალვაშს ეძლევა შესაძლებლობა, რომ რუსთავი 2-ის წილები დღესვე გადაიფორმოს, რადგან აღსრულების დროებითი შეჩერების მექანიზმის გაუქმება გასაჩივრებას არ ექვემდებარება.

მხარეებს სტრასბურგის სასამართლოს გადაწყვეტილების დიდ პალატაში გასაჩივრებისთვის სამთვიანი ვადა აქვთ. თუ გადაწყვეტილება აღნიშნულ ვადაში არ გასაჩივრდა, სამი თვის შემდეგ ძალაში შევა.

რუსთავი 2-ის საქმეზე სტრასბურის სასამართლოს გადაწყვეტილება

დღეს, 18 ივნისს რუსთავი 2-ის საქმეზე სტრასბურგის სასამართლოს გადაწყვეტილება გახდა ცნობილი. სტრასბურგის სასამართლომ მიიჩნია, რომ ადამიანის უფლებათა ევროპული კონვენციის არც ერთი მუხლი არ დარღვეულა. ამავე გადაწყვეტილებით, სტრასბურგის სასამართლომ აღარ დატოვა ძალაში აღსრულების დროებითი შეჩერების მექანიზმი. ამ მექანიზმის ამოქმედების გამო 2017 წელს არხი ქიბარ ხალვაშმა ვერ გადაიფორმა.

იუსტიციის მინისტრის თქმით, ხალვაშს არხის გადაფორმება დღესვე შეუძლია, არხის დირექტორი კი ამბობს, რომ დიდ პალატაში დავის დასრულებამდე მეწილეების ცვლილება იქნება ოპოზიციური მედიის ძალით დახურვის მცდელობა.