ქართული ოცნების თავმჯდომარე ბიძინა ივანიშვილი აცხადებს, რომ შინაგან საქმეთა მინისტრის გიორგი გახარიას გადადგომა "სამშობლოს ღალატი" იქნება. მისი თქმით, ევროპას და ვაშინგტონს არ დაუსვამს კითხვები 20 ივნისს პოლიციის მხრიდან ძალის გადამეტების შესახებ, ამიტომ შს მინისტრის გადადგომის საკითხი ვერ დადგება.

"მე ძალიან ბევრს შევხვდი ევროპელებს, შევხვდი ელჩებს, ვიცი ვაშინგტონის პოზიცია. ის რაც, ნახეს კადრები ძალის გამოყენების ლეგიტიმურობაზე არავის კითხვა არ აქვს. შესაბამისად, შინაგან საქმეთა მინისტრის პასუხისმგებლობაზე კითხვა არაა", — განაცხადა მან.

მისივე მტკიცებით, გიორგი გახარია გადასაყენებელი იქნებოდა მაშინ, თუ ის სახელმწიფო ინსტიტუცს, ამ შემთხვევაში პარლამენტს "აღებისგან" ვერ დაიცავდა.

"ის, რომ გახარია გადადგეს ესე იგი შინაგან საქმეთა სამინისტრო არ არსებობს. ძალადობა სახელმწიფო ინსტიტუტზე როდესაც ხდება და მას პოლიცია ვერ დაიცავს, რა თქმა უნდა, შინაგან საქმეთა მინისტრმა პასუხისმგებლობა უნდა აიღოს და გადადგეს. მაგრამ მან ეს მოახერხა. მან მოახერხდა დაიცვა მოძალადეები, მოძალადე პოლიტიკოსები, აი თქვენი მეპატრონეები, რუსთვი 2-ის", — განაცხადა ივანიშვილმა ჟურნალისტებთან.

ივანიშვილმა განაცხადა, რომ აქციის მონაწილეთა დაშავება ცალკეული პოლიციელების მხრიდან ძალის გადამეტებამ გამოიწვია, რასაც უწყებები იძიებენ და პასუხი გაეცემა.

"მეორე ნაწილი, რაც შეეხება ცალკეულმა პოლიციელებმა შსს-დან, რომელსაც ხელმძღვანელობს გიორგი გახარია, თუ ცალკეულ შემთხვევებში არაპროპორციული ძალა იყო გამოყენებული მიმდინარეობს გამოძიება, იძიებს პროკურატურა ერთი პოლიციელი უკვე ბრალდებულია, დანარჩენებს დაველოდებით", — განაცხადა მან.

20 ივნისის აქციის დაშლა კრიტიკულად შეაფასა რამდენიმე საერთაშორისო ორგანიზაციამ, მათ შორის საელჩოებმა. აქციის ღამეს გერმანიის ელჩი საქართველოში პარლამენტთან მივიდა და მოუწოდა დაპირისპირებულ მხარეებს არ მიემართათ ძალადობისთვის. იმავე ღაეს განცხადება გაავრცელა ამერიკის საელჩომ საქართველოში და მოუწოდა "ყველა მხარეს" შეინარჩუნებიათ სიმშვიდე, გამოეჩინათ თავშეკავება და ემოქმედათ კონსტიტუციის ფარგლებში.

მომხდარს გამოეხმაურა ადამიანის უფლებებზე მომუშავე საერთაშორისო ორგანიზაცია Amnesty International და პოლიციის ქმედებების დაუყოვნებლივი გამოძიება მოითხოვა. ძალის გამოყენების საკითხის გამოძიებისკენ სამართალდამცავ უწყებებს მოუწოდა საერთაშორისო უფლებადამცველმა ორგანიზაცია Human Rights Watch -მაც.

შინაგან საქმეთა მინისტრის, გიორგი გახარიას გადადგომის მოთხოვნით თბილისში უკვე 28-ე დღეს აქცია იმართება.