დღეს დილით ფეისბუქში შემოსულებს აუცილებლად დაგხვდებოდათ თქვენი მეგობრების ფოტოები, რომლებშიც 40-50 წელი აქვთ მომატებული. ნუ ინერვიულებთ, სანამ შაბათ-კვირას სამყაროსგან ისვენებდით, დროის მანქანა არ გამოუგონებიათ, თქვენი მეგობრები აპლიკაციას იყენებენ, სახელად FaceApp-ს.

როგორც TechCrunch ორი წლის წინ წერდა, აპლიკაცია რუსეთის ქალაქ სანტ-პეტერბურგში დეველოპერების პატარა გუნდმა შექმნა. მისი მფლობელი და დამფინანსებელი Yandex-ის დეპარტამენტის ყოფილი ხელმძღვანელი, იაროსლავ გონჩაროვია.

FaceApp პირველად 2017 წელს გავირუსდა, თუმცა განახლებების შემდეგ ის უფრო ბუნებრივი გახდა და კიდევ ერთხელ მიიპყრო მომხმარებლების ყურადღება. აპლიკაცია ნაწილობრივ ფასიანია, თუმცა ფუნქცია, რომელიც მომხმარებლებს აბერებს და აახალგაზრდავებს უფასოა. მისი საშუალებით შეიძლება ასევე თმის ფერის, ვარცხნილობის, გამომეტყველებისა და სქესის შეცვლა.

აპლიკაცია ხელმისაწვდომია როგორც App Store-ზე, ისე Google Play-ზე. აპლიკაცია ხელოვნურ ინტელექტს იყენებს და მომხმარებლების სახეებს სხვადასხვა ფილტრების დახმარებით საკმაოდ რეალისტურად უცვლის გარეგნობას.

აპლიკაცია App Store-ზე 227 ათასჯერ შეაფასეს და მისი რეიტინგი 4,7-ია.

iPhone-ზე დაინსტალირების შემდეგ, ის პირველ რიგში შეტყობინებების მიღების ჩართვას გთხოვთ, რაზეც შეგიძლიათ არ დაეთანხმოთ. ამის შემდეგ, აპლიკაციის ფუნქციების გამოსაყენებლად ის ფოტო-გალერეის ნახვას ითხოვს, ხოლო იმ შემთხვევაში, თუ მისი გამოყენებისას სურათის/სელფის გადაღება გსურთ, აპლიკაციას წვდომა უნდა მისცეთ კამერაზე.

FaceApp-ის უსაფრთხოების პოლიტიკა სხვა აპლიკაციებისგან დიდად განსხვავებული არაა. სერვისის გამოყენებისას მომხმარებელი თავად ირჩევს, ეთანხმება თუ არა საკუთარ კონტენტზე წვდომის გაზიარებას.

FaceApp აგროვებს ისეთ ინფორმაციას, როგორიცაა ფოტოები და სხვა მასალები, მაგალითად ელექტრონული ფოსტის მისამართი, რომელზეც შესაძლოა განახლებებზე მიიღოთ ინფორმაცია:

"ჩვენ ვიყენებთ გარეშე ანალიზის ინსტრუმენტებს ტრაფიკისა და ტრენდების შესამოწმებლად. ეს ინსტრუმენტები აგროვებენ ინფორმაციას, რომელიც თქვენი მოწყობილობიდან მოგვაწოდეთ, მათ შორის რომელ ვებგვერდებს სტუმრობთ. ჩვენ სხვადასხვა მომხმარებლისგან ინფორმაციას ერთად ვაგროვებთ, შესაბამისად, ბაზაში კონკრეტული მომხმარებლის ვინაობის დადგენა არ ხდება".

აპლიკაცია უფლებას იტოვებს სთხოვოს რეკლამის განმთავსებლებს ან სხვა პარტნიორებს, რომ თქვენს მობილურში რელევანტური რეკლამები წარმოგიდგინოთ, აპლიკაცია ამისთვის ქუქის და სხვა ტექნოლოგიებს იყენებს, რომლებიც მესამე პირსაც შესაძლოა ეკუთვნოდეს.