თსუ-ს რექტორი გიორგი შარვაშიძე აცხადებს, რომ უნივერსიტეტი დაანონსებულ სტრატეგიული გეგმის შემუშავებას ხუთშაბათს იწყებს, რომელშიც მონაწილეობას აუდიტორია 115-ის წევრებიც მიიღებენ. ის განმარტავს, რომ აღნიშული გეგმა მოიცავს როგორც უნივერსიტეტის შიგნით გადასაწყვეტ საკითხებს, ისე მის ფარგლებს გარეთ, კანონში შესატან ცვლილებებსაც.

მისი განცხადებით, პროცესში ყველა დაინტერესებული მხარე, პროფესურა, მეცნიერები და სტუდენტები მიიღებენ მონაწილეობას, ხოლო იდეების განხორციელებასთან დაკავშირებით გადაწყვეტილებას აკადემიური საბჭო მიიღებს:

"ჩვენი ვარაუდით, საექსპერტო საზოგადოება ჩაერთვება ამ საქმეში და საშუალება გვექნება ღია, თანამედროვე დოკუმენტი მივიღოთ, სადაც იქნება ხედვა იმისა, თუ როგორი გვინდა გახდეს უნივერსიტეტი. ძირითადად ეს დოკუმენტი დაეფუძნება იმ კონცეპტუალურ ხედვას, რომელიც გაზიარებულია აკადემიური საბჭოს მიერ და ბევრი სიახლე იქნება ამ დოკუმენტში. ვვარაუდობთ, რომ ეს სიახლე დაიწყება ძალიან სწრაფად, დრო ცოტა გვაქვს, დავპირდით ჩვენს ამომრჩეველს, რომ 3 თვეში განმავლობაში მოხდება ამ დოკუმენტის მიღება, ამდენად მუშაობა უკვე ამ კვირაში დაიწყება".

შარვაშიძე განმარტავს, რომ ყველაზე მნიშვნელოვანია სწავლების პროცესთან კვლევების შერწყმა და მასში ჩართვა ყველა სტუდენტს უნდა შეეძლოს:

"მეორე რაც უნდა შეიცვალოს, არის სტუდენტური ცხოვრება, რომელიც ბევრ ასპექტს მოიცავს. აქ არის ბმა დასაქმებასთან, თუ როგორ საქმდება ჩვენი კურსდამთავრებული. ის მოთხოვნები, რომელსაც უყენებს შრომის ბაზარი დღევანდელ საუნივერსიტეტო განათლებას, უნდა იყოს გათვალისწინებული სწავლების შინაარსში. მესამე არის ინტერნაციონალიზაცია, თანამშრომლობა ჩვენს პარტნიორ უნივერსიტეტებთან იმისთვის, რომ მოხდეს ერთობლივი დიპლომების გაცემა".