კოკა-კოლა ბოთლერს ჯორჯიას პრეზიდენტი, თემურ ჭყონია ამბობს, რომ თუ მამუკა ხაზარაძე შესთავაზებს, რომ საზოგადოებრივი მოძრაობისთვის საჭირო იქნება, რაღაც მიმართულებით გვერდით დაუდგება. ამის შესახებ ჭყონიამ პრაიმტაიმს განუცხადა.

"მამუკა ხაზარაძემ შეიძლება ისეთი გუნდი შექმნას, სადაც იქნებიან ეკონომისტები, პოლიტიკოსები და ის თაობა, რომელსაც შეუძლია საქართველოს ეკონომიკაზე და პოლიტიკაზე იმოქმედოს სერიოზულად. თუ გადახედავთ ხაზარაძის ბიზნესში მოღვაწეობას, მიხვდებით, რომ გრძელვადიან პერსპექტივაში გეგმები, რომელსაც ის უძღვება, ყოველთვის არის შედეგიანი", — ამბობს ჭყონია.

მისივე განცხადებით, პარლამენტში ვალდებულებების აღებას ვერ შეძლებს.

"თაობა, რომელიც სჭირდება საქართველოს განვითარებას, უნდა იყოს სხვა მენტალიტეტით დატვირთული და აბსოლუტურად სუფთა. ჩემი აქტიურობა ამ საქმეში არ იქნება პოლიტიკაში მოსვლით, ჩემი აქტიურობა როგორი იქნება, ჯერ არ ვარ ჩამოყალიბებული", — ამბობს ჭყონია.

მამუკა ხაზარიძის ინფორმაციით, მეგობრებთან და თანამოაზრეებთან, სხვადასხვა სფეროს პროფესიონალებთან ერთად საზოგადოებრივ მოძრაობას სექტემბერში დააფუძნებს და მთავარი მიზანი ქვეყნის გაერთიანება და მისი დამოუკიდებლობის და თავისუფლების შენარჩუნება იქნება.