ჩეჩნეთის ლიდერი რამზან კადიროვი რუსთავი 2-ის ეთერში გიორგი გაბუნიას მიერ ვლადიმერ პუტინის მისამართით გინებას გამოეხმაურა. მან ჟურნალისტს "არარაობა" და "ნაძირალა" უწოდა. ის ასევე დარწმუნებულია, რომ გიორგი გაბუნიას მოქმედება მხოლოდ მისი მოფიქრებული არაა. კადიროვმა ტელეგრამის არხზე დაწერა, რომ კავკასიელი კაცი არ იყენებს ისეთ სიტყვებს, როგორიც გაბუნიამ გამოიყენა.

კადიროვმა აღნიშნა, რომ კავკასიაში კაცი ისეთ სიტყვებს არ ამბობს, როგორიც რუსთავი 2-ის ეთერში გიორგი გაბუნიამ თქვა. კადიროვისვე განცხადებით, ამის შემდეგ ქართველი ჟურნალისტი "არც კავკასიის შვილად, არც კაცად და არც მთიულად" არ მიაჩნია.

ამავე დროს მან უსუსური მცდელობა უწოდა იმას, რომ ეს ყველაფერი "ერთი ჟურნალისტის გამოხტომამდეა დასული":

"ყველაფერი მოხდა ისე, როგორ დაგეგმა არხმა, შეიძლება რუსთავი 2-ის კედლების გარეთაც".

კადიროვს მიაჩნია, რომ საქართველოს თანამდებობის პირებმა ოფიციალურად საჯაროდ უნდა მოუხადოს ბოდიში პუტინს, ხოლო გაბუნიას წინააღმდეგ სისხლისამართლებრივი დევნა დაიწყოს.

ამავე დროს, მან თქვა, რომ საქართველოს წინააღმდეგ ყველაზე მკაცრი სანქციები უნდა ამოქმედდეს, მაგრამ ისე, რომ არ შეეხოს რუსეთის მოქალაქე ქართველებს.

მას მიაჩნია, რომ ყველაფერი უნდა შეფასდეს, როგორც საქართველოს მხრიდან "კარგად დაგეგმილი საძაგელი აქცია, თუ ქვეყნის ხელისუფლება საწინააღმდეგოს არ დაამტკიცებს":

"წინააღმდეგ შემთხვევაში, სამ დღეში საქართველოს მიმართულებით ყველა გზა და ბილიკი უნდა ჩაიკეტოს".

ამავე დროს, კადიროვი რჩევას იძლევა, რომ სჯობს გაბუნია შვიდი ჭიშკრის იქით ჩაიკეტოს "რადგან მსოფლიოში არის მილიონობით ახალგაზრდა, რომელთაც უყვართ პუტინი" და "პირველივე შემხვედრი გაუკეთებს მას იმას, რაც დაიმსახურა".

პუტინის გინება, რ2-ის პოზიცია და გამოხმაურებები

რუსთავი 2-ის პირდაპირ ეთერში წამყვანმა გიორგი გაბუნიამ რუსეთის ფედერაციის პრეზიდენტს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. გაბუნიას ქცევა არხმა კატეგორიულად დაუშვებლად მიიჩნია და გაემიჯნა. მთავრობის წარმომადგენლებმა კი ეს ქვეყნის წინააღმდეგ ომად შეაფასეს.

კახა კალაძემ თქვა, რომ ამას მკაცრი რეაგირება უნდა მოჰყვეს და ქვეყნისთვის საფრთხის შექმნას არ დაუშვებენ. მსგავსი შინაარსის განცხადებები ჰქონდათ პრემიერ-მინისტრსა და პარლამენტის თავმჯდომარესაც. ორივე მათგანმა აღნიშნა, რომ გაბუნიას გინება საფრთხეს ქმნის და ქვეყნის მტრობაა. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე".

რუსთავი 2 ამბობს, რომ გაბუნიას მიმართვას არხის თვითრეგულირების ორგანო განიხილავს, მთავრობის წარმომადგენლების მსგავსი შეფასებები კი სარედაქციო პოლიტიკაში ჩარევად მიაჩნიათ.

გაბუნიას მიმართვა უკვე შეაფასა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

ამის ფონზე კი რუსთავი 2-თან აქცია გაიმართა, სადაც მოითხოვდნენ, რომ გაბუნიას დაეტოვებინა არხიც და ქვეყანაც. ანტიოპოზიციური და პროსახელისუფლებო ფეიჯები, ასევე, ძალადობრივი ჯგუფები და ქართული ოცნების მხარდამჭერები მოსახლეობას მოუწოდებდნენ, რომ "არ შეარჩიონ გაბუნიას" მომხდარი.

ამავე თემაზე: