საპატრიარქო თბილისი პრაიდის ორგანიზატორების მიერ ღირსების მარშის დაანონსებასთან დაკავშირებით განცხადებას ავრცელებს.

განცხადება სავსეა ჰომოფობიური შეფასებებით და მასში საპატრიარქო მოვლენების შესაძლო განვითარებაზე სრულ პასუხისმგებლობას პრაიდის ორგანიზატორებსა და მხარდამჭერებს აკისრებს.

"სოდომური ცხოვრების წესის მქონე ადამიანები მუდამ იყვნენ და მათი არსებობა ჩვენს საზოგადოებაში არასდროს იწვევდა მწვავე დაპირისპირებას, მაგრამ ამ გარყვნილების ნებისმიერი სახით პროპაგანდა ყოველთვის იყო მიუღებელი. ამიტომაც, როდესაც რუსთაველის გამზირზე მიმდინარე საპროტესტო აქციაში აქტიურად მონაწილეობდნენ ე.წ. პრაიდის ორგანიზატორები და LGBT წარმომადგენლები, ამას რაიმე სახის ექსცესი არ გამოუწვევია; ეს ფაქტი კიდევ ერთხელ ადასტურებს იმ გარემოებას, რომ მათ, როგორც ყველას, არ ეზღუდებათ თავიანთი უფლებების რეალიზება; მაგრამ, როდესაც აღნიშნული ჯგუფები უგულებელყოფენ ხალხის აბსოლუტური უმრავლესობის ნებას და ეწევიან თავიანთი "ფასეულობების" პოპულარიზაციას, ეს ბუნებრივად იწვევს დიდ გაღიზიანებას და სამოქალაქო დაძაბულობის შექმნის მიზანმიმართულ მცდელობად აღიქმება", - ნათქვამია განცხადებაში.

საპატრიარქო მიიჩნევს, რომ პრაიდი არაა ცალკე აღებული მოვლენა და შორსმიმავალი სტრატეგიის ერთ-ერთი ეტაპია და მიმართულია ერთნაირსქესიანთა ქორწინებისა და მათ მიერ შვილის აყვანის უფლების საკანონმდებლო დონეზე დაფიქსირებისაკენ.

"იმედს გამოვთქვამთ, რომ სახელმწიფო ისეთ ნაბიჯებს გადადგამს, რაც უზრუნველყოფს საზოგადოებრივი სიმშვიდის შენარჩუნებას. შევთხოვთ ღმერთს, შეგვეწიოს, რათა ჩვენმა ხალხმა ეს განსაცდელიც მშვიდობით განვლოს", - ამ სიტყვებით სრულდება განცხადება.

Tbilisi Pride ღირსების მარშს 8 ივლისს გამართავს.