თბილისი პრაიდის ფარგლებში დაგეგმილი ღირსების მარში ხვალ, 8 ივლისს გაიმართება. ამის შესახებ ინფორმაციას თბილისი პრაიდი Facebook-ზე ავრცელებს.

მათი თქმით, მარში 22 ივნისს უნდა გამართულიყო, თუმცა, 20 ივნისს განვითარებული მოვლენების გამო გადაიდო.

"ეს ჩვენთვის მტკივნეული გადაწყვეტილება ქვეყანაში უცაბედად შექმნილი დაძაბული პოლიტიკური ვითარებით იყო განპირობებული. ჩვენ, როგორც ამ ქვეყნის მოქალაქეებმა სოლიდარობა გამოვუცხადეთ მათ, ვინც სრულიად სამართლიანად აპროტესტებდა პარლამენტის წინ რუსულ ოკუპაციას და რუსი პარლამენტარის სამარცხვინო ვიზიტს საქართველოში", — აღნიშნულია განცხადებაში.

მათივე თქმით, შინაგან საქმეთა სამინისტროს გააჩნია სრული რესურსი, რათა უზრუნველყოს ღირსების მარშის უსაფრთხო და მშვიდ გარემოში ჩატარება.

"იმედი გვაქვს, რომ საქართველოს მთავრობა სრულად აცნობიერებს მასზე დაკისრებულ პასუხისმგებლობას და დადგება მოწოდების სიმაღლეზე, რათა დაცული იყოს ღირსების მარშის თითოეული მონაწილის უსაფრთხოება", — ნათქვამია განცხადებაში.