"რუსეთსა და საქართველოს შორის დიალოგის აღდგება შესაძლებელი იქნება მას შემდეგ, რაც დაასრულებს "რუსოფობიურ ტალღას" საქართველოში და ბოდიშს მოიხდის", — ეს განცხადება რუსეთის ფედერალური საბჭოს სპიკერმა ვალენტინა მატვიენკომ გააკეთა.

"ჩვენ არ გვაქვს ანტიქართული სენტიმენტები. ჩვენ ისევ გვიყვარს ქართველები, ჩვენ გვაქვს ერთ ქვეყანაში თანაცხოვრების გრძელი ისტორია. თუმცა საქართველოს მთავრობა რაც შეიძლება ყველაფერს აკეთებს, რომ ეს ურთიერთობები გაწყვიტოს", — განაცხადა ჟენევაში ვალენტინა მატვიენკომ.

მისივე ცნობით, დიალოგი შეუძლებელი იქნება იქამდე, სანამ საქართველო არ აჩვენებს ძალას, არ აღადგენს წესრიგს და არ შეაჩერებს რუსოფობიურ ტალღას.

"მოიხადონ ბოდიში ყველაფრისთვის, რაც მოხდა და დიალოგი შესაძლებელი იქნება. საქართველოსა და რუსეთს შორის კონფლიქტი არ არის", — ამბობს ის.

მან ასევე თქვა, რომ საქართველომ "აჩვენა, რომ არის საერთაშორისო ორგანიზაციების უპასუხისმგებლო წევრი და აწყობს პროვოკაციებს, რომელიც ზრდის რუსოფობიას".

საქართველოში ანტისაოკუპაციო აქციები #სირცხვილია მე-11 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში,სამედიცინო დაწესებულებაში რჩება.

შედეგად, აქციები ამ დრომდე გრძელდება შინაგან საქმეთა მიინისტრის გიორგი გახარიას გადაგომის მოთხოვნით.