ცოტა ხნის წინ, მორისიმ ჯიმი ფელონის შოუში ახალი ალბომიდან California Son სიმღერა Morning Starship შეასრულა. მას ბრიტანეთის ულტრამემარჯვენე პარტიის მხარდამჭერი ლოგო ეკეთა.

პარტიის For Britain ლიდერი, ენი მარი ვოთერსი ისლამს "ეშმაკს" უწოდებს და მოიხსენიებს კულტურად, რომელიც "თანამედროვე საზოგადოებაში ვერ ჯდება". ცოტა ხნის წინ, მან მორისის მადლობა გადაუხადა პარტიის მხარდაჭერისთვის.

ავსტრალიელი მუსიკოსი, ნიკ ქეივი კითხვაზე თუ რას ფიქრობს The Smiths-ის ფრონტმენის, მორისის შესახებ მის ადრეულ წლებში და დღევანდელ დღეს — პასუხობს "პირადად მე, როდესაც სიმღერას ვწერ და პუბლიკას წარვუდგენ, ის უკვე აღარაა ჩემი სიმღერა. ამას ყველა თავისებურად იღებს და ეს უკვე ჩვენი ერთობლივი შემოქმედებაა."

შემდეგ კი განაგრძობს:

"მაგალითად, როდესაც ჩემ საყვარელ სიმღერას, ნილ იანგის On The Beach-ს ვუსმენ, მგონია, რომ ეს სიმღერა ექსკლუზიურად მე მესაუბრება. ყველანაირი რაციონალურობის მიღმა ვფიქრობ ხოლმე, რომ ის ჩემი წარმოსახვისთვის დაიწერა და ჩემ ცხოვრებას ერგება. ის მე მესმის ყველაზე კარგად და სხვა არავის. სწორედ ეს არის მუსიკის სილამაზე.

მორისის რაც შეხება, მე მგონია, რომ მისი ქცევა და შეხედულებები განცალკევებულად უნდა განვიხილოთ. მისი მუსიკის სმენისას მისი პოლიტიკური შეხედულებები არარელევანტური ხდება. რაც არ უნდა თქვას, არ უნდა დავივიწყოთ, რომ მისმა შთამბეჭდავმა მუსიკალურმა კატალოგმა უამრავი ფანის ცხოვრებას კვალი დაატყო. ეს პატარა საქმე არ არის."

ნიკ ქეივს მიაჩნია, რომ ვინც არტისტების ბოიკოტირებას მათი შეხედულებების გამო ახდენს, მხოლოდ საკუთარ თავს უკეთებს ცუდ საქმეს. - "მე მესმის, თუ რატომ აკეთებენ ადამიანები ამას, მაგრამ ამავდროულად მგონია, რომ ბევრს კარგავენ." - ამბობს მუსიკოსი.

"უბრალოდ ვაცადოთ, ჰქონდეს მორისის ის შეხედულებები, რაც აქვს. როცა შეგვეძლება დავაყენოთ გამოწვევის წინაშე, მაგრამ მივცეთ უფლება მის მუსიკას, რომ იარსებოს. ჩვენ ყველას გვაქვს კონფლიქტი საკუთარ თავთან და ყველანი ვუშვებთ შეცდომებს."

The Smiths-ის ყოფილი ფრონტმენი ბოლო წლებში კონტროვერსული ფიგურა გახდა. 2007 წელს მან NME-სთან ინტერვიუში თქვა, რომ სხვა ეროვნების ადამიანები "ბრიტანულ იდენტობას" აქრობენ. 2010 წელს მან ჩინელებს "ქვესახეობები" უწოდა. ისლამის მხრიდან ხორცის შეზღუდვაზე კი თქვა, რომ ეს "ბოროტება იყო".