პარლამენტი ნიკა მელიასთვის იმუნიტეტის შეჩერებაზე მსჯელობას იწყებს. ბიუროს სხდომაზე განიხილავენ საქართველოს პროკურატურის მომართვას ნიკა მელიას პატიმრობის ნებართვასთან დაკავშირებით.

ნაციონალური მოძრაობის დეპუტატმა რომან გოცირიძემ მოუწოდა ქართულ ოცნებას არ დაუჭირონ მხარი პროკურატურის მომართვას და არ დაიწყონ "პოლიტიკური რეპრესიები".

"ეს ახლა რაც ხდება, ფაქტობრივად, მყარდება პოლიტიკური დიქტატურა და იწყება პოლიტიკური რეპრესიები ქვეყანაში. მე მოგიწოდებთ პარლამენტს, თითოეულ თქვენგანს, რომელმაც ამ მომართვას უნდა უყაროს კენჭი. ნუ ჩაიდენთ დანაშაულს. ნუ შეუწყობთ ხელს ქვეყანაში მძიმე ვითარების შექმნას. ეს არის პირდაპირ პოლიტიკური დევნა. თითოეულ ადამიანს, ვინც ამ წინადადებას მისცემს ხმას, გაასამართლებს ისტორია, გაასამართლებს კანონი და გაგასამართლებენ საკუთარ ოჯახში", — განაცხადა რომან გოცირიძემ.

მას გამოეხმაურა საქართველოს პარლამენტის ახალი თავმჯდომარე არჩილ თალაკვაძე და განაცხადა, რომ ბიურო ვალდებულია მიიღოს პროკურატურის მომართვა და პროცედურის მიხედვით კომიტეტებს განსახილველად გადაუგზავნოს. ამ განცხადებას ოპოზიციასა და უმრავლესობას შორის დაპირისპირება მოჰყვა.