საქართველოს ყოფილი პრეზიდენტი, მიხეილ სააკაშვილი თბილისში, 20 ივნისის მიმდინარე მოვლენებს გამოეხმაურა და ოპოზიციას გაერთიანებისკენ მოუწოდა. მან ვიდეო მიმართვა გაავრცელა სადაც აღნიშნა, რომ "ყველა ბოროტების სათავე ოლიგარქი ივანიშვილია".

"დღეს რაც მოხდა საქართველოში ეს იყო ბოლო წერტილი საქართველოს დამცირების, შეფურთხების საქართველოზე, მის სიმბოლიკაზე, მის ღირსებაზე, დაგვირგვინება იმ პოლიტიკის, რასაც წლების განმვალობაში აკეთებს ბიძინა ივანიშვილი", — აღნიშნა მიხეილ სააკაშვილმა.

საქართველოს ყოფილი პრეზიდენტის აზრით, უნდა შეძლონ ბიძინა ივანიშვილი მშვიდობიანად ჩამოშორება და შემდეგ არჩევნების გზით ხელისუფლების შეცვლა.

"ამ საკითხში მზად ვარ ბოლომდე დაგიჭიროთ მხარი, ასევე ჩავერთო პროცესში იქ სადაც თქვენ, ქართველი ხალხი, პოლიტიკური სპექტრი ჩათვლის ჩემს ჩართვას საჭიროდ", — აღნიშნა მიხეილ სააკაშვილმა.

დღეს, 20 ივნისს მართლმადიდებლობის საპარლამენტთაშორისო ასამბლეის წევრი და რუსი დეპუტატი, სერგეი გავრილოვი პარლამენტის თავმჯდომარის სავარძელზე დაჯდა. ამ წუთებში საქართველოს პარლამენტთან მოქალაქეები რუსი დეპუტატების ჩამოსვლასა და რუსეთის ოკუპაციას აპროტესტებენ. ოპოზიციის წევრები პარლამენტის თავმჯდომარის, ირაკლი კობახიძის გადადგომასაც ითხოვენ.