პატრიოტთა ალიანსის წევრი და პარლამენტის თავმჯდომარის მოადგილე, ირმა ინაშვილი დიპლომატიურ კორპუსს მოუწოდებს, რომ თბილისი პრაიდის მსვლელობაში მონაწილეობა არ მიიღონ. მიმართვის წერილი პარლამენტის დეპუტატმა ფეისბუქზე გაასაჯაროვა.

განცხადებაში ირმა ინაშვილი აღნიშნავს, რომ დიპლომატიურმა კორპუსმა საზოგადოების განწყობა და შინაგან საქმეთა სამინისტროს განცხადება უნდა გაითვალისწინოს და მსვლელობაში მონაწილეობაზე უარი უნდა თქვას.

"ქართველი ხალხი გამორჩევა სიბრძნითაც, გონიერებითაც, ლმობიერებითაც, მაგრამ იქ, სადაც ასეთი თვალსაჩინოა საზოგადოების უმრავლესობის უკიდურესი აღელვება, თავს ვალდებულად ვთვლი, მოგიწოდოთ დაიკავოთ არა ერთი მხარის პოზიცია, არამედ შეინარჩუნოთ ობიექტურობა, მიუკერძოებლობა და, პირველ რიგში, თქვენსავე უსაფრთხოების მიზნით, არ მიიღოთ მონაწილეობა თბილისი პრაიდის საჯარო მსვლელობაში, რასაც, ვიმეორებ, უკვე ღია პროვოკაციის სახე აქვს", — აღნიშნავს პარლამენტის დეპუტატი.

თბილისში 18-დან 23 ივნისის ჩათვლით LGBTQI პრაიდი გაიმართება. კვირეულის ფარგლებში სხვადასხვა სოციალური, კულტურული და პოლიტიკური ღონისძიებია დაგეგმილი. მათ შორისაა საერთაშორისო კონფერენცია, სოციალური სპექტაკლი და "ღირსების მარში". თბილისი პრაიდის ორგანიზატორების ინფორმაციით, ღირსების მარში 23 ივნისს გაიმართება, თუმცა ამ ეტაპისთვის ზუსტი ადგილმდებარეობა გასაჯაროვებული არ არის.

თბილისი პრაიდის გუნდი ამბობს, რომ დაგეგმილ საჯარო მსვლელობაში მონაწილეობას მიიღებენ საერთაშორისო ორგანიზაციებისა და დიპლომატიური კორპუსის წარმომადგენლობები, მხარდამჭერი ჯგუფები, ოჯახის წევრები, მეგობრები. ასევე, ევროკავშირისა და მეზობელი სახელმწიფოების მოქალაქეები. ისინი მოუწოდებენ ყველას, სექსუალური ორიენტაციისა და გენდერული იდენტობის მიუხედავად შეუერთდნენ მათ.