დარჩება თუ არა სამოქალაქო პლატფორმა - ახალი საქართველო ბურჭულაძის კოალიციაში ჯერ უცნობია, თუმცა ცნობილია, რომ დღეს პაატა ბურჭულაძე გიორგი ვაშაძესთან შეხვედრას გეგმავს და დღესვე გახდება პლატფორმის მიერ მიღებული გადაწყვეტილება ცნობილი.

როგორც ახალი საქართველოს წევრმა, გურამ ჩალაგაშვილმა განაცხადა, მის პლატფორმას ბურჭულაძის გუშინდელ განცხადებაში ეჭვი არ შეაქვს:

"ჩვენ არ გვაქვს არანაირი უფლება, რომ ეჭვი შევიტანოთ ბატონი პაატა ბურჭულაძის ნათქვამში, ან მიზეზში, როგორც ბატონმა პაატამ თქვა, დაითხოვა გირჩის წარმომადგენლები კოალიციიდან. ასე რომ როდესაც ჩვენ დავსხდებით ბატონ გიორგისთან განვიხილავთ ამ საკითხს და შემდეგ გიორგი გააკეთებს განცხადებას ამ თემაზე დამოუკიდებლად".

ახალი საქართველოს ერთ-ერთმა დამფუძნებელმა, ლევან ხაბეიშვილმა კი განაცხადა:

"რაც შეეხება დაფინანსებას და გაშვებას და მსგავს ბოდვას, ეს არის სისულელე და არის მოგონილი. ამას რეალობასთან არანაირი კავშირი არ აქვს, ეს შემიძლია, რომ ცალსახად გითხრათ. რაც შეეხება ჩვენს გადაწყვეტილებას, ეს უკვე საჯარო იქნება ხვალ. გადაწყვეტილება იქნება მიღებული იქედან გამომდინარე, რა სჭირდება ქვეყანას და არა პირადად ჩვენ".

27 სექტემბერს გირჩმა მოძრაობა სახელმწიფო ხალხისთვის დატოვა და განაცხადა, რომ 2016 წლის არჩევნებს გამოტოვებს. პაატა ბურჭულაძემ კი განმარტა, რომ გირჩს ბიძინა ივანიშვილი აფინანსებდა.

On.ge ცდილობს დაუკავშირდეს გიორგი ვაშაძეს და ინფორმაციის მიღებისთანავე შემოგთავაზებთ მას.