კონსერვატიული პარტიის თავმჯდომარის კენჭისყრის პირველ ტურში ყოფილი საგარეო საქმეთა მინისტრი, ბორის ჯონსონი ლიდერობს. საბოლოოდ პარტიის ლიდერის ვინაობა ივლისის შუა რიცხვებში გახდება ცნობილი და ქვეყნის პრემიერ-მინისტრიც ის გახდება.

პარტიის ლიდერის არჩევის პირველ ტურში მხოლოდ თემთა პალატის წევრი 313 კონსერვატორი დეპუტატი იღებდა მონაწილეობას. ბორის ჯონსონს 114-მა დეპუტატმა დაუჭირა მხარი. მეორე და მესამე ადგილებზე საგარეო საქმეთა მინისტრი ჯერემი ჰანტი (43) და გარემოს დაცვის მინისტრი მაიკლ გოუვი (37) გავიდნენ. მათთან ერთად შემდეგ ტურში გადავიდნენ ბრექსიტის საკითხების ყოფილი მინისტრი დომინიკ რააბი (27), შინაგან საქმეთა მინისტრი საჯიდ ჯავიდი (23), საერთაშორისო განვითარების მინისტრი რორი სტიუარტი (19) და ჯანდაცვის მინისტრი მეტ ჰენკოკი (20).

კენჭისყრა 20 ივნისამდე გაგრძელდება, ამ დროისთვის კი უკვე პარტიის ლიდერობის ორი კანდიდატი უნდა დარჩეს. ორი ფინალისტიდან ლიდერს კონსერვატიული პარტიის დაახლოებით 160 ათასი წევრი აირჩევს. პარტიაში იმედოვნებენ, რომ საბოლოოდ ლიდერს 20 ივლისისთვის დაასახელებენ. ახალმა ლიდერმა კი ქვეყანა ბრექსიტის კრიზისიდან უნდა გამოიყვანოს.

პარტიის ლიდერობის, შესაბამისად პრემიერ-მინისტრობის არც ერთი კანდიდატი ბრექსიტის გაუქმების წინააღმდეგი არაა. თუმცა შეთანხმების გარეშე ევროკავშირის დატოვების მომხრეები ბორის ჯონსონი და დომინიკ რააბი არიან.

ტერეზა მეიმ პრემიერ-მინისტრის პოსტი 7 ივნისს დატოვა. ამასთანავე ის პარტიის თავმჯდომარეობიდან გადადგა, რომელიც მას 2016 წლიდან ეკავა. ერთ-ერთი მიზეზი, რამაც მის გადაწყვეტილებაზე გავლენა იქონია ბრექსიტი და ევროკავშირთან მიღწეული შეთანხმებაა, რომელიც პარლამენტმა სამჯერ დაიწუნა.

ტერეზა მეის პრემიერობის პერიოდში ბრექსიტზე უთანხმოების გამო თანამდებობიდან გადადგა საგარეო საქმეთა მინისტრი ბორის ჯონსონი და ბრექსიტის საკითხების ორი მინისტრი. ბოლო რამდენიმე თვეში უნდობლობის ვოტუმი გამოუცხადეს როგორც მას, ისე მთავრობას. გაწელილი ბრექსიტის გამო მკვეთრად დაეცა როგორც ტერეზა მეის, ისე კონსერვატიული პარტიის რეიტინგი, რაც, საბოლოოდ, რეგიონულ არჩევნებშიც აისახა.