საფრანგეთის პრეზიდენტი, ემანუელ მაკრონი ამბობს, რომ აშშ-ს პრეზიდენტ დონალდ ტრამპს "მეგობრობის ახალ ხეს" გაუგზავნის. მაკრონმა და ტრამპმა მეგობრობის ნიშნად მუხის ხე თეთრი სახლის ეზოში 2018 წელს დარგეს. ერთი წლის თავზე კი ცნობილი გახდა, რომ ხემ კარანტინს ვერ გაუძლო და გახმა.

სოციალურ ქსელში ხის გახმობის გამო გამოწვეულ რეაქციაზე მაკრონი ამბობს, რომ ხალხმა ყველაფერში სიმბოლოების კითხვა უნდა შეწყვიტოს.

"მუხის სხვა ხეს გავაგზავნი, რადგან მიმაჩნია, რომ აშშ-ს საზღვაო ქვეითები და ჩვენ ქვეყნებს შორის მეგობრობა ამას იმსახურებს", — განაცხადა ემანუელ მაკრონმა.

ერთი წლის წინ ემანუელ მაკრონმა დონალდ ტრამპს მუხის ხე მეგობრობის ნიშნად აჩუქა. ნერგი პარიზის ჩრდილო-აღმოსავლეთიდან, ბელოს ტყიდან ჩაიტანეს. სწორედ ამ ტყეში პირველი მსოფლიო ომის დროს, 1918 წელს გაიმართა სასტიკი ბრძოლა, რომელშიც 1 800-ზე მეტი ამერიკელი დაიღუპა.

დარგვის შემდეგ კამერებმა დააფიქსირეს, რომ ხე გაქრა. როგორც შემდეგ გაირკვა ხე კარანტინში მოათავსეს, რათა დაავადებებები და ინვაზიური მწერები არ გავრცელებულიყო. აშშ-ში საფრანგეთის ელჩმა, ჟერარდ არომ თქვა, რომ კარანტინის შემდეგ ხე თავის ადგილზე დაბრუნდებოდა.