რკინიგზელთა ახალი პროფკავშირის ინფორმაციით, ხარაგაულის რაიონის სოფელ ძირულაში, 50-მდე მუშა მე-3 დღეა შრომის პირობების გაუმჯობესების მოთხოვნით გაიფიცა. დასაქმებულების თხოვნით, ადგილზე დღეს რკინიგზელთა ახალი პროფესიული კავშირის ლიდერები ჩავიდნენ. პროფკავშირის წარმომადგენლებმა და გაფიცულთა საინიციატივო ჯგუფმა, დღეს ერთობლივად დაგეგმეს სამოქმედო ნაბიჯები.

რკინიგზელთა ახალი პროფკავშირის ხელმძღვანელი, ვიტალი გიორგაძე On.ge-სთან საუბარში ამბობს, რომ კომპანიას არ აქვს გაფორმებული ინდივიდუალური შრომითი კონტრაქტები დასაქმებულებთან, შესაბამისად, ხელფასები გამომუშავებაზეა, არ აღრიცხავენ სამსახურში ყოფნა/არყოფნას. ვიტალი გიორგაძე ფიქრობს, რომ ეს არ არის ტექნიკური პრობლემა, არამედ მიზანმიმართულია, რათა არ გადაუხადონ მუშებს ანაზღაურება სრულად:

"არ ისვენებენ ერთ დღესაც კი და ეუბნებიან რომ თქვენ იმუშავეთ თვეში 15 დღე. მოუწესრიგებელია ამ მხრივ. გარდა ამისა, არ აქვთ დასვენების დღეები, შვებულებით სარგებლობის უფლება, აბსოლუტურად დარღვეულია უსაფრთხოების ნორმები, არ აქვთ სპეცტანსაცმელი, არ აქვთ გამოსაცვლელი ოთახი, საშხაპე, ეს არის რაღაც პირველყოფილი ურთიერთობები".

ფოტო: რკინიგზელთა ახალი პროფკავშირი

ფოტო: რკინიგზელთა ახალი პროფკავშირი

პროფკავშირების ცნობით, კომპანია შპს ჩინეთის გზებისა და ხიდების კორპორაციის საქართველოს ფილიალმა დასაქმებულებს არასრული სახელფასო ანაზღაურება გადაუხადა, რაც მუშებში უკმაყოფილების მთავარი მიზეზი გახდა. შედეგად მშრომელები მე-3 დღეა გაფიცულები არიან და შროშა-ძირულას საავტომობილო მაგისტრალის მშენებლობა პარალიზებული აქვთ.

პროფკავშირი მოუწოდებს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, სამუშაო პირობებისა და შრომის უსაფრთხოების მონიტორინგის მიზნით, ადგილზე გაგზავნოს შრომის ინსპექციის წარმომადგენლები და მედიაციის მექანიზმის გამოყენებით, უზრუნველყოს კოლექტიურ შრომით დავაზე, მხარეებს შორის მოლაპარაკებების გამართვის პროცესის დაწყება.