ხორავას ქუჩაზე მოკლული დავით სარალიძის მამა, ზაზა სარალიძე ამბობს, რომ ბოლო ორი თვის განმავლობაში პროცესებს ჩამოშორდა, რადგან დიდი საფრთხე დაინახა. გადაცემა პირველებში საუბრისას მან აღნიშნა, რომ მოზარდებს შორის დაპირისპირების საფრთხე არსებობდა.

"მინდა ყველამ გაითავისოს, ყველა ადამიანმა მოქალაქემ თუ პოლიტიკოსმა, რომ ზაზა სარალიძე ამ ბრძოლით მიაღწევდა ჭეშმარიტებას, თუ ავდგებოდი და დავხოცავდი სუყველას, ამას მნიშვნელობა არ ჰქონდა, მაგრამ მე დავინახე საფრთხე, რომ ზაზა სარალიძეს ამას დაასწრებდა სხვა. ესენი არიან ჩემი შვილის მეგობრები, ლევან დადუნაშვილის მეგობრები. ზაზა სარალიძე იბრძვის იმისთვის, რომ ამ ომს, ამ სისხლს, სისხლი არ გაყვეს კიდევ, რაშიც დარწმუნებული ვიყავი და დავინახე კიდეც თვალნათლივ", — განაცხადა სარალიძემ.

რაც შეეხება მისი და მალხაზ მაჩალიკაშვილის ურთიერთობას, ზაზა სარალიძე ამბობს, რომ მათ შორის დაპირისპირება არ ყოფილა. გარდა ამისა, სარალიძე ამბობს, რომ საქმეში ახალი დეტალები და მტკიცებულებები გამოჩნდა, რომლებზეც გამოძიების დასრულებამდე ვერ ისაუბრებს. როგორც მან აღნიშნა, მტკიცებულებები ახალი გამოძიების ფარგლებშია მოპოვებული:

"არ იფიქროს ვინმემ, რომ მე ამ პროცესს ვენდობი, თუ პროკურორებმა ისევ არ გადაწყვიტეს მიხეილ კალანდიას ადვოკატირება. აუცილებლად დავესწრები ყველა პროცესს როცა არსებითი განხილვები დაიწყება".