ეკონომიკის მინისტრის ნათია თურნავას თქმით, მშენებლობისა და ტექნიკური ზედამხედველობის სააგენტოს ხელმძღვანელი, გრიგოლ კაკაურიძე ვალდებული არ იყო, ფოთის ნავსადგურის მშენებლობის ნებართვაზე მისთვის ეცნობებინა. ამის მიზეზად თურნავა ამბობს, რომ სამინისტროში მაშინ რამდენიმე დღის მისული იყო. 30 მაისს გრიგოლ კაკაურიძე ნათია თურნავას ბრძანების საფუძველზე გაათავისუფლეს.

"ფაქტია, რომ პროცესი დაიწყო იქამდე, სანამ დავინიშნებოდი მინისტრად... არ იყო ვალდებული, რა თქმა უნდა, რომ ჩავეყენებინე საქმის კურსში ახალმოსული მინისტრი, რადგან ეს დოკუმენტი ბოლოშია გასული და გაიცემა", — ამის შესახებ ეკონომიკის მინისტრმა დღეს, 7 ივნისს დარგობრიივ ეკონომიკის სხდომაზე განაცხადა. მიუხედავად ამისა, თურნავა იქვე ამბობს, რომ როდესაც საუბარია მნიშვნელოვან პროექტზე და ინვესტორზე, სსიპ-ოს უფროსს მაინც უნდა ეცნობებინა მისთვის.

ნათია თურნავას თქმით, ახლა ამ საკითხზე შიდა მოკვლევა მიმდინარეობს, რომლის ამოცანაა გაარკვიოს, რამ ვერ იმუშავა და რატომ იყო კომუნიკაციის ნაკლებობა. მინისტრის განცხადებით, მოკვლევის მიზანი არაა ვინმე დაისაჯოს:

"უკვე მივიღეთ მძიმე საკადრო გადაწყვეტილებები".

ფოთში ახალი ღრმაწყლოვანი ნავსადგურის მშენებლობის ნებართვის დოკუმენტი ეკონომიკის სამინისტრომ 30 მაისს გააუქმა. ამას წინ უძღოდა ანაკლიის კონსორციუმის საგანგებო განცხადება, სადაც აღნიშნულია, რომ მთავრობამ მათ ფოთში ახალი ნავსადგურის მშენებლობაზე ნებართვის გაცემა დაუმალა. თურნავას განმარტებით, ეს დოკუმენტი არ წარმოადგენს სამშენებლო ნებართვას, არამედ ესაა ე.წ. მიწათსარგებლობის წინასწარი პირობების დოკუმენტი.