საპარტნიორო ფონდის აღმასრულებელმა დირექტორმა, დავით საგანელიძემ თქვა, რომ ფონდი დაფინანსებას მასში შემავალი ორგანიზაციებიდან იღებს და მის მართვაში არ ერევა. ამის შესახებ დავით საგანელიძემ პარლამენტში საპარტნიორო ფონდის ეფექტურობაზე საუბრის დროს განაცხადა.

"როგორ დავგეგმოთ ჩვენ მომავალი წელი, როცა აღმოჩნდა, რომ იგივე წელს და შარშან ამ კომპანიებს არ ჰქონდათ დივიდენდი და ჩვენ აღმოვჩნდით საკმაოდ რთულ სიტუაციაში, თუნდაც უცხოელ პარტნიორებთან, სხვაზე რომ არაფერი ვისაუბროთ", — აღნიშნა დავით საგანელიძემ.

დავით საგანელიძემ თქვა, რომ ის კომპანიები, რომლებსაც საპარტნიორო ფონდი მართავს, ყოველ დახარჯულ ერთ დოლარზე შვიდი დოლარის ინვესტიციის მოზიდვას ახერხებენ.

კომიტეტის სხდომაზე საპარტნიორო ფონდის წარმომადგენლის მისვლის საკითხი ქართული ოცნების ყოფილმა დეპუტატმა ლევან კობერიძემ დააყენა. მისი თქმით, ეს გადაწყვეტილება მას შემდეგ მიიღო, რაც ეკონომიკის ყოფილმა მინისტრმა, გიორგი ქობულიამ აღნიშნა, რომ საპარტნიორო ფონდი არაეფექტურია.

საპარტნიორო ფონდმა, რომლის შემადგენლობაშია საქართველოს რკინიგზა, გაზისა და ნავთობის კორპორაცია, თელასის აქციების 24,5% და ელექტრო სისტემა 2017 წელს 440 მილიონზე მეტი ზარალით დაასრულა. მაშინ, როცა ფონდის ხელმძღვანელმა, დავით საგანელიძემ თანამდებობრივ სარგოდ 300 ათას ლარამდე აიღო (თვეში 24 500 ლარი). გარდა ამისა, საქართველოს სახელმწიფო ელექტროსისტემამ რომელიც სრულად საპარტნიორო ფონდის მფლობელობაშია, 2017 წელს დაგეგმილზე 250 მილიონი ლარით ნაკლები შემოსავალი მიიღო.

გაიგეთ მეტი: