ოზურგეთის რაიონულმა სასამართლომ თექვსმეტი წლის ასაკს მიუღწეველთან გარყვნილ ქმედებასა და თვითმკვლელობამდე მიყვანაში ბრალდებული კაცი დამნაშავედ ცნო და მას 7 წლით თავისუფლების აღკვეთა მიუსაჯა.

სასამართლოს ინფორმაციით, 2018 წლის მარტში კაცმა ფეისბუქით არასრულწლოვანი გოგო გაიცნო, რომელსაც პირად პროფილზე შიშველი ფოტოები გადააგზავნინა. გარდა ამისა, სასამართლო აცხადებს, რომ კაცის მოთხოვნით გოგომ ინტიმური ფოტო-ვიდეო ფაილები გადაიღო და მას გადაუგზავნა.

"2018 წლის აგვისტოში კაცი სოციალური ქსელით ისევ დაუკავშირდა არასრულწლოვანს და მუქარით და იძულებით ინტიმური ხასიათის ვიდეოს გადაღება მოსთხოვა. კაცის მხრიდან განხორციელებული მუქარის, სასტიკი მოპყრობის, მისი პატივის და ღირსების სისტემატური დამცირების გამო არასრულწლოვანმა გოგონამ 2018 წლის 15 აგვისტოს საცხოვრებელი სახლის აივანზე თავი ჩამოიხრჩო", — აღნიშნულია განცხადებაში.

სამართალდამცველებმა ბრალდებული 2018 წლის 17 აგვისტოს ოზურგეთში დააკავეს. მას ბრალდება საქართველოს სისხლის სამართლის კოდექსის 141-ე მუხლის პირველი ნაწილით (თექვსმეტი წლის ასაკს მიუღწეველთან გარყვნილი ქმედება) და 115-ე მუხლით (თვითმკვლელობამდე მიყვანა) წარედგინა და აღკვეთის ღონისძიების სახით პატიმრობა შეეფარდა.