პარლამენტის ფრაქცია ქართული ოცნების თავმჯდომარის, მამუკა მდინარაძის განაცხადების მიუხედავად, "განაწყენებული, გუნდიდან წასული ადამიანების შეკრებაზე" მმართველი პარტიის დეპუტატები მაინც მივიდნენ. ეკონომიკის ყოფილ მინისტრ გიორგი ქობულიასთან შეხვედრას ქართული ოცნებიდან ესწრებიან: მირიან წიკლაური, შოთა შალელაშვილი და ზაზა ხუციშვილი. მოგვიანებით მივიდა ბიძინა გეგიძეც.

ფოტო: ანა ვახტანგაძე / On.ge

ფოტო: ანა ვახტანგაძე / On.ge

ფოტო: ანა ვახტანგაძე / On.ge

"გუნდიდან წასული დეპუტატების და გუნდიდან წასული მინისტრების შეხვედრაზე ჩვენ მგონია, რომ არაფერი გვესაქმება და ასევე საზოგადოებამ უკვე იცის და ხვდება კარგად კონკრეტულ მიზეზებს თუ რატომ გადადგა კონკრეტული ადამიანი თანამდებობიდან. დანარჩენი არის ნეგატიური პიარის ნაწილი, რაც მათი საქმეა, მათი უფლებაა", — ამბობდა მდინარაძე.

ქობულია პარლამენტში დამოუკიდებელმა დეპუტატებმა მიიწვიეს. ამის შესახებ, ქართული ოცნებიდან წამოსულმა, ლევან კობერიძემ განაცხადა. ქობულიამ კი დღეს აღნიშნა, რომ მოწვევა ქართული ოცნების დეპუტატებიდანაც მიუვიდა.

პრემიერ-მინისტრმა, მამუკა ბახტაძემ გიორგი ქობულიას გათავისუფლების შესახებ ბრძანებას ხელი 18 აპრილს მოაწერა. 4 მაისს შაბათის კურიერში გავიდა ქობულიას კომენტარი, სადაც ის ამბობდა, რომ თანამდებობა თავისი ნებით არ დაუტოვებია.

"ხედვებში არ მოხდა თანხმობა ჩემსა და მმართველი პოლიტიკური პარტიის ხელმძღვანელობას შორის. ის პრინციპები, რაზეც მეგონა, რომ ჩემი მინისტრობის დასაწყისში შევთანხმდით, ჩემი აზრით, არ გამართლდა. ამას მოყვა ის, რაც მოხდა", — განაცხადა ქობულიამ.