ქართული ოცნებიდან წამოსული დეპუტატის, ლევან კობერიძის განცხადებით, ეკონომიკის ყოფილი მინისტრი გიორგი ქობულია ხვალ, 15 მაისს პარლამენტში მივა და კითხვებს უპასუხებს. მისი თქმით, ქობულიას ღია ფორმატში მისვლა შესთავაზეს, რაზეც ის დათანხმდა.

"ვისაც აინტერესერესებს მისი საქმიანობა, ის, რაც მან 8 თვის განმავლობაში გაწია, ასევე, მისი ხედვები ეკონომიკის განვითარებასთან დაკავშირებით საქართველოში. პლუს, იქნება კითხვა-პასუხი, რაზეც აქვს ინტერესი საზოგადოებას", — განაცხადა კობერიძემ.

კობერიძის თქმით, ქობულია წარადგენს პრეზენტაციას. შეხვედრა პარლამენტის კინოდარბაზში პირველ საათზე გაიმართება.

პრემიერ-მინისტრმა, მამუკა ბახტაძემ გიორგი ქობულიას გათავისუფლების შესახებ ბრძანებას ხელი 18 აპრილს მოაწერა. 4 მაისს შაბათის კურიერში გავიდა ქობულიას კომენტარი, სადაც ის ამბობდა, რომ თანამდებობა თავისი ნებით არ დაუტოვებია.

"ხედვებში არ მოხდა თანხმობა ჩემსა და მმართველი პოლიტიკური პარტიის ხელმძღვანელობას შორის. ის პრინციპები, რაზეც მეგონა, რომ ჩემი მინისტრობის დასაწყისში შევთანხმდით, ჩემი აზრით, არ გამართლდა. ამას მოყვა ის, რაც მოხდა", — ამბობს ქობულია.