ევროპული საქართველოს დეპუტატმა, სერგი კაპანაძემ განაცხადა, რომ მმართველი გუნდის წარმომადგენლების მოსმენისას კარლსონის ეპიზოდი ახსენდება. მიზეზად დეპუტატმა ხარჯების გადანაწილებაზე არასწორი ხედვა დაასახელა.

"როცა ბიჭუნა და კარლსონი იყოფენ შაქარყინულებს, ბიჭუნა ეკითხება: რამდენი შაქარყინული არის. კარლსონი პასუხობს, რომ მე თანაბრად გავყავი შაქარყინულებიო. რამდენი შეგხვდაო ეკითხება და ეუბნება: ჩემი 7 უკვე შევჭამეო. სულ ათი იყოო, მაგრამ თანაბრად გავყავიო", — უამბო დეპუტატებს კაპანაძემ.

მისი თქმით, ასე ემართებათ მთავრობის წარმომადგენლებსაც, როცა ყველა სფეროში ბიუჯეტის გაზრდას ცდილობენ. კაპანაძემ იკითხა, რის ხარჯზე აპირებენ და რომელ სფეროს მოაკლდება თანხა ამ დანახარჯების გასაზრდელად.

"ინფრასტრუქტურის მინისტრი ამბობს, რომ ინფრასტრუქტურა იქნება პრიორიტეტი შემდეგი წლების განმავლობაში. განათლების მინსიტრი მოდის და განათლების კომიტეტის წარმომადგენლები იძახიან, რომ 6%-ზე უნდა ავიდეს მშპ-ს განათლების ხარჯები. ჯანდაცვის კომიტეტის თავმჯდომარე ამბობს ახლა, რომ 5%-ზე ავიდეს ჯანდაცვის ხარჯები. თავდაცვა ამბობს, რომ უნდა იყოს დაკმაყოფილებული მინიმალური 2 თუ 3%-იანი. ყველამ რომ თქვენ-თქვენი შაქარყინულები მოიზომეთ და წაიღეთ", — განაცხადა კაპანაძემ.

დღეს, 14 მაისს პარლამენტის სხდომაზე განათლების სამინისტროში დაგეგმილი რეფორმებს განიხილავენ. სამინისტროში აცხადებენ, რომ არსებული თანხა არ არის საკმარისი და განათლების სექტორის დაფინანსება მშპ-ს 6 %-მდე უნდა გაიზარდოს.