თითქმის შვიდსაათიანი გამოკითხვიდან გამოსულმა მალხაზ მაჩალიკაშვილმა განაცხადა, რომ იმ ჩანაწერში, რომელიც უწყებამ გაავრცელა თარგმანში უზუსტობები იყო. მისი თქმით, ამის შესახებ გამოკითხვაზე განაცხადა.

"სიმართლე რომ გითხრათ, კონკრეტულად რა ნაწილში იყო და როგორ მაგის ახსნა არ შემიძლია. იმიტომ, რომ ამ წუთას მე ვერა ვარ, ასე ვთქვათ, არა მაქვს ის ძალა რომ ეს ყველაფერი აგიხსნათ", — განაცხადა მაჩალიკაშვილმა.

მაჩალიკაშვილის ადვოკატის, მარიამ კუბლაშვილის განცხადებით, ჰქონდა მოლოდინი, რომ დააკავებდნენ მისი დაცვის ქვეშ მყოფს, თუმცა გამოკითხვა მშვიდ ვითარებაში წარიმართა. მისი თქმით, მაჩალიკაშვილმა ყველა კითხვას ამომწურავად გასცა პასუხი.

კუბლაშვილმა განაცხადა, რომ გამოკითხვისას სუს-მა დამატებითი მტკიცებულებები წარადგინა. ასევე, როგორც მან აღნიშნა გააცნეს სასამართლოს განკარგულება, რომლითაც ფარული მიყურადების უფლება მიეცათ.

მაჩალიკაშვილს სახელმწიფო უსაფრთხოების სამსახურის მიერ გავრცელებული ჩანაწერის თაობაზე კითხავდნენ.

ფარული ჩანაწერი სავარაუდო ტერაქტზე

7 მაისს სახელმწიფო უსაფრთხოების სამსახურმა ბრიფინგზე განაცხადა, რომ პანკისის სპეცოპერაციის დროს მოკლული თემირლან მაჩალიკაშვილის მამას, მალხაზ მაჩალიკაშვილს ტერორისტული აქტის ორგანიზების გზით რამდენიმე პირის მკვლელობის განზრახვა ჰქონდა. უწყება ამტკიცებს, რომ მაჩალიკაშვილი ტერორისტული აქტის ჩადენას სუს-ის უფროსის ყოფილი მოადგილის, სოსო გოგაშვილის მიმართ აპირებდა.

მოდულის შენობაში დაკითხვაზე იყო მალხაზ მაჩალიკაშვილის ძმისშვილი, მორის მაჩალიკაშვილის, რომელიც სუს-ის მტკიცებით, მალხაზ მაჩალიკაშვილის გეგმის მიხედვით, ჩართული უნდა ყოფილიყო აღნიშნული ტერორისტული აქტის განხორციელებაში. უწყებამ მათი საუბრის ჩანაწერი გაასაჯაროვა.

მაჩალიკაშვილის ყველა ბრალდებას უარყოფს და ამბობს, რომ ამით მისი ოჯახის განადგურებას ცდილობენ. ის ამბობს, რომ კარავში რჩება, ბრძოლას გააგრძელებს და თუ დამნაშავეა, მზადაა დააკავონ.

"თუ მე საშიში ვარ ამ ქვეყნისთვის, თუ მე ტერორისტი ვარ რატომ არ მაკავებენ ამდენი ხანი? 2 თვის წინ სადღაც გამწარების დროს ნათქვამი და ჩაწერილი სიტყვების გამო დღეს ტერორისტს მეძახიან. რატომ არ წამასწრეს დანაშაულზე და არ დამაკავეს, თუ ტერორისტი ვარ? კი მე სულ მაქვს სურვილი გავიგო იმ ადამიანების შესახებ მეტი ვინც შვილი მომიკლეს. მაგრამ ეს დანაშაულის ჩადენაა?" — აცხადებს მალხაზ მაჩალიკაშვილი.

ამავე თემაზე: