იუსტიციის უმაღლესი საბჭოს წევრი და ქუთაისის სააპელაციო სასამართლოს მოსამართლე, დიმიტრი გვრიტიშვილი ფეისბუქზე წერს, რომ არასამთავრობო ორგანიზაციებს ამიერიდან "გიგაური-მშვენიერაძის კლანად" მოიხსენიებს.

"ჯერ ვფიქრობდი, მშვენიერაძის ნაცვლად სალაძე ხომ არ ჩამესვა ტანდემში, მაგრამ არა, ამ ბოლო დროს აშკარად გამოიკვეთა, რომ მშვენიერაძე უფრო დიდი საზოგადო მოღვაწეა. ჯანეზაშვილ-დოლიძესაც ამის შემდეგ ცალკე აღარ გამოვყოფ, ეგენი ხომ ხსენებული კლანის ჯარისკაცები და რუპორები არიან", — წერს მოსამართლე.

დიმიტრი გვრიტიშვილი ერთ-ერთი ის მოსამართლეა, რომელსაც არასამთავრობო ორგანიზაციები ე.წ. ჩინჩალაძე-მურუსიძის სასამართლოს კლანის წევრად განიხილავენ. გარდა ამისა, გვრიტიშვილი იმ მოსამართლეების სიაში იყო, რომელიც საბჭომ უზენაეს სასამართლოში მოსამართლეთა კანდიდატებად წარადგინა. აღნიშნული სია გააკრიტიკეს პარლამენტარებმა, არასამთავრობო ორგანიზაციებმა და საბჭოს არამოსამართლე წევრებმა.