გაეროში საქართველოს ახალგაზრდობის წარმომადგენელმა ლიკა ტორიკაშვილმა საერთაშორისო ახალგაზრდულ ფორუმი "SDG თაობა: როგორ ვაქციოთ მიზნები მიღწევებად" გამართა. ფორუმში მონაწილეობა მიიღეს სხვადასხვა სფეროში მოღვაწე 10-მა ახალგაზრდა ქალმა, რომლებმაც თავიანთი წარმატების ისტორიასა და ამ წარმატების გზაზე არსებული გენდერული სტერეოტიპების შესახებ ისაუბრეს.

გენდერული სტერეოტიპები ჩვენს საზოგადოებაში იმდენად გავრცელებულია, რომ მოზარდებს ხშირად უჭირთ იმის გააზრება, რამხელა გავლენა შეიძლება მოახდინოს გენდერული საკითხებისადმი არაჯანსაღმა შეხედულებებმა მათ პიროვნულ განვითარებაზე. იმისათვის, რომ სტერეოტიპების მსხვერპლნი არ გავხდეთ, მნიშვნელოვანია მეტი ვიცოდეთ ისეთი საკითხების შესახებ, როგორებიცაა:

  • ადამიანის უფლებები;
  • გენდერული თანასწორობა;
  • რეპროდუქციული ჯანმრთელობა და სხვა.

ფორუმის უმთავრესი მიზანი იყო, ახალგაზრდები დაფიქრებულიყვნენ არსებულ სტერეოტიპებსა და იმ როლზე, რომელსაც ანიჭებენ ქალებს განათლების, კულტურისა თუ მდგრადი განვითარების სხვა სფეროებში. ისინი გაეცნენ სტერეოტიპების იდეას და განიხილეს გენდერული სტერეოტიპების უსამართლო ბუნება, ასევე იმსჯელეს გაეროს 2030 წლის დღის წესრიგის მეხუთე მიზნის – გენდერული თანასწორობის – შესახებ.

ფოტო: ილიაუნი

"ჩვენი გამომსვლელების მოხსენებებს ძალიან აქტიური გამოხმაურება მოჰყვა, რაც იმას მიანიშნებს, რომ ეს თემები ნამდვილად აქტუალურია და ქართველი ახალგაზრდები ძალიან დაინტერესებულები არიან. მალალას კლასელების ისტორია განსაკუთრებით გამოსარჩევია, რადგან მათმა გამოსვლამ დიდი მოწონება დაიმსახურა. ერთია, როცა წიგნში კითხულობ იმ ისტორიას, რაც მათ გადახდა თავს, ხოლო მეორეა, როცა პირდაპირ ისტორიის მონაწილეებისგან ისმენ მას", - ამბობს ლიკა ტორიკაშვილი.

ღონისძიების სტუმრები იყვნენ: დიდი ბრიტანეთიდან შაზია რამზანი (Shazia Ramzan) და კაინათ რიაზი (Kainat Riaz), ნობელის მშვიდობის პრემიის ყველაზე ახალგაზრდა ლაურეატის, მალალა იუსუფზაის თანაკლასელები, რომლებიც წლების განმავლობაში მალალასთან ერთად იბრძვიან, რათა ყველა გოგონას ჰქონდეს განათლების მიღების საშუალება, ასევე კარენ სუდრი – ისრაელის ახალგაზრდობის წარმომადგენელი გაეროში და აზიზა აზნიზანი – მალაიზიის "Paint the World-ის" დამფუძნებელი.

ფოტო: ილიაუნი

"ასეთი ფორუმების ჩატარება ძალიან მნიშვნელოვანია იმისთვის, რომ გენდერულ სტერეოტიპებზე საუბარი უფრო მეტად აქტუალური გახდეს. მე მალაიზიიდან ვარ, სადაც ქალთა უფლებებზე საუბარიც კი რთულად წარმოსადგენია. აქ ვითარება განსხვავებულია, რაც აქტიური მუშაობის შედეგია. მიხარია, რომ მომეცა საშუალება ქართველ ახალგაზრდებს შევხვედროდი და მათთვის ჩემი გამოცდილება გამეზიარებინა", - ამბობს აზიზა აზნიზანი.

ახალგაზრდული ფორუმი ხორციელდება გაეროს სააგენტოებთან – გაეროს მოსახლეობის ფონდსა (UNFPA) და გაეროს განვითარების პროგრამასთან (UNDP) პარტნიორობით, შვედეთის მთავრობის მიერ დაფინანსებული გაეროს ერთობლივი პროგრამის "გენდერული თანასწორობისთვის" ფარგლებში. ღონისძიების მხარდამჭერი ილიას სახელმწიფო უნივერსიტეტი იყო.