თემირლან მაჩალიკაშვილის მკვლელობის საქმეზე, პარლამენტის დროებითი საგამოძიებო კომისიის შექმის მიზანშეწონილობა კიდევ ერთხელ მოითხოვა ნაციონალურმა მოძრაობამ, თუმცა საკითხს პარლამენტის პლენარულ სხდომაზე დეპუტატებმა მხარი არ დაუჭირეს. კენჭისყრა დღეს, 29 მაისს გაიმართა. დადგენილებას მხოლოდ 30 მომხრე ჰყავდა, მის მისაღებად კი 50 დეპუტატის ხმა იყო საჭირო.

სპეცოპერაცია პანკისში

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა.

რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს.

სახელმწიფო უსაფრთხოების სამსახურის ინფორმაციით, 19 წლის თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო და რამდენიმე დღეში საავადმყოფოში გარდაიცვალა. მაჩალიკაშვილის ოჯახი სუს-ის ვერსიას არ იზიარებს და ამბობს, რომ თემირლანი მოკლეს. ოჯახის წევრები ამბობენ, რომ სპეცოპერაციის ღამეს მათთან სუს-ის უფროსის მაშინდელი მოადგილე სოსო გოგაშვილი იყო ჩასული და ემუქრებოდა.

გოგაშვილი 21 აგვისტოს მოულოდნელად თანამდებობიდან გადადგა.