ლონდონის სასამართლომ WikiLeaks-ის დამფუძნებელს ჟულიან ასანჟს გირაოს პირობების დარღვევისთვის 50-კვირიანი პატიმრობა მიუსაჯა. ინფორმაციას ამის შესახებ The Guardian ავრცელებს. ცხრა წლის წინ ასანჟი სასამართლომ გირაოს სანაცვლოდ გაათავისუფლა, რის შემდეგაც მან თავი ეკვადორის საელჩოს შეაფარა.

როგორც BBC წერს, ასანჟმა მოსამართლეს წერილი გადასცა, სადაც თავისი გადაწყვეტილების შესახებ მწუხარებას გამოთქვამდა. სასამართლოში წერილის რამდენიმე ფრაგმენტი წაიკითხეს:

"რაღაც მომენტში მივხვდი, რომ საშინელ სიტუაციაში ვარ. და როგორც მაშინ მეჩვენებოდა, ერთადერთი და საუკეთესო არჩევანი გავაკეთე".

ჟურნალისტების გარდა სასამართლო პროცესს აქტივისტები და უფლებადამცველები ესწრებოდნენ.

2010 წელს შვედეთში WikiLeaks-ის დამფუძნებელი ჟულიან ასანჟი ორმა ქალმა გაუპატიურებაში დასდო ბრალი. შემდგომში გამოძიება გაჩერდა. ასანჟი ამტკიცებდა, რომ ბრალდებები სპეციალურად წაუყენეს, რათა შემდგომში აშშ-ს გადასცენ, სადაც მას პენტაგონისა და სვა უწყებების საიდუმლო მასალების გამოქვეყნებისთვის ბრალდებები ელოდებოდა.

ამავე წელს ასანჟი ლონდონი პოლიციის განყოფილებაში მივიდა, სადაც ის დააკავეს, თუმცა სასამართლომ ცხრადღიანი პატიმრობის შემდეგ ის გირაო სანაცვლოდ გაათავისუფლა.

ასანჟის შვედეთში ხელისუფლებისთვის გადასაცემად 2012 წელს ლონდონის სასამართლომ დაკავების განჩინება გასცა. ასანჟმა თავი ლონდონში ეკვადორის საელჩოს შეაფარა, სადაც 2019 წლის 11 აპრილამდე იმყოფებოდა. პოლიციამ ასანჟი მას შემდეგ დააკავა, რაც ეკვადორმა მას საელჩოში თავშესაფრის მიცემაზე უარი უთხრა.

როგორც ეკვადორის პრეზიდენტმა, ლენინ მორენომ განმარტა, WikiLeaks-ის დამფუძნებელმა საერთაშორისო კონვენციები არაერთხელ დაარღვია, რის გამოც თავშესაფრის უფლება ჩამოართვა.