ეს სტატია შეიცავს სპოილერებს და თუ ვინტერფელის ბრძოლის ამსახველი ეპიზოდი ჯერ არ გინახავთ, სჯობს, ახლავე შეწყვიტოთ კითხვა

ფოტო: HBO

სამეფო კარის თამაშების მერვე სეზონის მესამე ეპიზოდმა, "გრძელმა ღამემ" Rotten Tomatoes-ზე 74%-იანი შეფასება დაიმსახურა, რაც ბოლოსწინა მაჩვენებელია. როგორც ჩანს, მაყურებელი ცოცხლებისა და მკვდრების ბრძოლისაგან მეტს ელოდა, რაც გასაკვირი არაა, რადგან სერიალი წლების განმავლობაში გვამზადებდა სწორედ ამ მომენტისათვის.

ეს შედეგი კიდევ უფრო თვალშისაცემია, თუ გავითვალისწინებთ, რომ სერიებს პირველიდან მეშვიდე სეზონის ჩათვლით საშუალოდ 94%-იანი შეფასება ჰქონდათ.

ყველაზე დაბალშეფასებიანი სერია კი მეხუთე სეზონში გვხვდება. "Unbowed, Unbent, Unbroken"-ს 54% აქვს. ამ სერიაში ვნახეთ სანსას გაუპატიურების სცენა, რომელსაც კრიტიკოსებში არაერთგვაროვანი გამოხმაურება მოჰყვა.

კრიტიკოსები უმეტესად არადამაკმაყოფილებელ დასასრულზე საუბრობენ

მიუხედავად იმისა, რომ მაყურებლების უმეტესობას არიას ხელით ღამის მეფის სიკვდილი გაუხარდა, შემფასებლების აზრით, მთავარი ბოროტმოქმედის განადგურება ბოლო სეზონის მესამე სერიაში ცოტა ნაადრევი იყო. Ringer-ის მიმომხილველი წერს, რომ ეს ეპიზოდი "უცნაურად მარტივი გადაწყვეტა გამოდგა სიუჟეტური ხაზისათვის, რომელიც სერიალს სულ პირველი ეპიზოდიდან ასაზრდოებდა".

Rolling Stone's: "თუკი მკვდრების არმიასთან ბრძოლა რეალური ფინალური ბრძოლიდან მხოლოდ გადახვევა უნდა ყოფილიყო, მაშინ ბევრად უკეთესი სანახაობა უნდა შემოეთავაზებინათ, ვიდრე "The Long Night-ში" ვიხილეთ"

Daily Telegraph-ის მიმომხილველი ედ პაუერი ასევე იმედგაცრუებული დარჩა სანახაობით: "რამდენად სწორია, რომ 82-წუთიანი ბრძოლის შემდეგ მხოლოდ მხრების აჩეჩვის ემოცია გქონდეს?"

აქვე ჩართვა: თქვენ ხომ არ იცით, რა მნიშვნელობა ჰქონდა სპირალისებურ ნახაზებს, რომელთაც თეთრი მავალები გზად ტოვებდნენ?

ფოტო: HBO

კრიტიკის ნაწილი შოუს ჩაბნელებულ სცენებსაც მიემართებოდა და მიუხედავად იმისა, რომ საყვარელი გმირების ბედზე ბევრს ვნერვიულობთ, ცოტა დაუჯერებელია, რომ თითქმის ყველა მთავარი პერსონაჟი გადარჩა.

თუმცა, იყო პოზიტიური გამოხმაურებებიც

74% Game of Thrones-ისთვის შეიძლება ცოტა მოგვეჩვენოს, მით უმეტეს, რომ სერიალის 22 ეპიზოდს იდეალური, 100%-იანი შეფასება აქვს, თუმცა უნდა ვაღიაროთ, რომ ბევრი სერიალისთვის ესეც მიუღწეველი სიმაღლეა. ნებისმიერი ნიშნული 60%-ზე მაღლა კარგ შეფასებად ითვლება.

იყვნენ ისეთი მიმომხილველებიც, რომელთაც სერია მოეწონათ - მაგალითად, ჯერემი ეგნერი New York Times-დან: "ბოლო შეტაკება დაძაბულობისა და ამოსუნთქვის, ჟრუანტელისა და გულისტკენის, გრანდიოზულობისა და მგრძნობიარობის შედევრი იყო". IGN-ის ლაურა პრუდომმა სერიალის შემქმნელები "მრავალი პერსონაჟის განვითარების დაბალანსებისთვის შეაქო". Forbes-ის ჟურნალისტმა ერიკ კაინმა კი აღნიშნა, რომ "რაღაც განსაკუთრებულის მომსწრენი გავხდით".