მას შემდეგ, რაც მთელი მსოფლიო ყველაზე პოპულარული და სახელგანთქმული წყვილის - ბრედ პიტისა და ანჯელინა ჯოლის განქორწინებაზე ალაპარაკდა, ჭორებმაც არ დააყოვნა და ბრანჯელინას დაშორება ხან ალკოჰოლს და ხანაც მარიონ კოტიარს დააბრალეს.

ამასობაში კი როგორც People იუწყება, ბრედმა დუმილი დაარღვია და ანჯელინასთან დაშორებასთან დაკავშირებით პირველი კომენტარი გააკეთა.

"ძალიან ვწუხვარ ჩემი და ანჯელინას დაშორების გამო, მაგრამ ახლა ყველაზე მთავარი ჩვენი ბავშვების კეთილდღეობაა", თქვა განცხადებაში ბრედ პიტმა.

კომენტარი გაავრცელა ანჯელინა ჯოლიმაც და მედიას მოუწოდა ამ რთულ პერიოდში ოჯახს მხარში დაუდგნენ, თუნდაც ბავშვების გამო და დაიცვან ამ ამბის კონფიდენციალურობა.

წყვილთან დაახლოებულმა პირმა კი განაცხადა, რომ განქორწინების შესახებ ამბავი მისთვის მოულოდნელი და შოკისმომგვრელი იყო, ისევე როგორც სრულიად მსოფლიოსთვის.

ასევე გავრცელდა ჭორი, რომ ანჯელინა ჯოლის და ბრედ პიტის ოჯახის დანგრევის მიზეზი მსახიობი მარიონ კოტიარია.

ფოტო: getty images

თუმცა ამბობენ, რომ ყველაფერი ეს დადგმულია და სკანდალი რობერტ ზემეკისის ახალი ფილმის პიარისთვის კეთდება, სადაც ბრედ პიტი და მარიონი ერთად თამაშობენ. მით უმეტეს, რომ ფილმის პრემიერა 23 ნოემბერს არის დაგეგმილი.

შეგახსენებთ, რომ ბრედმა და ანჯელინამ ერთმანეთი 2005 წელს "მისტერ და მისის სმიტების" გადასაღებ მოედანზე გაიცნეს და მას შემდეგ ერთად არიან. 2014 წელს კი ოფიციალურად დაქორწინდნენ. წყვილს 6 შვილი ჰყავს.