აჭარის ტელევიზიის ოპერატორები ამტკიცებენ, რომ ერთი კვირის წინ მათ მიერვე გავრცელებული განცხადება პროტესტის შეწყვეტის შესახებ სიმართლეს არ შეესაბამება. მათი თქმით, მოთხოვნები უცვლელია და დაუკმაყოფილებლობის შემთხვევაში ისევ გაიფიცებიან, ამ ეტაპზე კი ისინი "სოლიდარულად განაგრძობენ საპროტესტო კამპანიას".

ოპერატორებმა გაფიცვის შეწყვეტის შესახებ მაშინ განაცხადეს, როცა აჭარის ტელევიზიის დირექტორის, ნათია კაპანაძის გადაყენების ინფორმაცია გავრცელდა. მათ აღნიშნეს, რომ ახალ მენეჯმენტთან აპირებდნენ მოლაპარაკებების დაწყებას.

"ტელევიზიის დირექტორის მოვალეობის შემსრულებელთან მოლაპარაკების შედეგად მივიღეთ პირობა, რომ ოპერატორების სამუშაო პირობები და ანაზღაურება გადაიხედება. ჩვენ პასუხისმგებლობით ვეკიდებით ამ შეთანხმებას. გაფიცვას მივმართავთ მხოლოდ იმ შემთხვევაში, თუ მოთხოვნები არ დაკმაყოფილდა და შეთანხმება დათქმულ ვადაში ვერ შედგა", — წერია მათ განცხადებაში, რომელსაც აჭარის ტელევიზია ავრცელებს.

მაუწყებლის 13 ოპერატორი ხელფასების გაზრდას ან სამუშაო პირობების შეცვლას რამდენიმე თვე ითხოვდა. მათი თქმით, ოპერატორთან ერთად მემონტაჟის ფუნქციის შესრულებაც უწევთ და ანაზღაურებაც შესაბამისი უნდა ჰქონდეთ.

ოპერატორები 19 აპრილს, დირექტორის იმპიჩმენტის განხილვის დღეს გაიფიცნენ. ისინი ამტკიცებდნენ, რომ გაფიცვის დღე სპეციალურად არ დაუმთხვევიათ მრჩეველთა საბჭოს სხდომისთვის და მათ განაცხადი უფრო ადრე შეიტანეს, ვიდრე სხდომა ჩაინიშნა.