საქართველოს პრეზიდენტი ოკუპირებულ აფხაზეთსა და ე.წ სამხრეთ ოსეთში დუმის არჩევნების ჩატარებას დაუშვებლად მიიჩნევს. პრეზიდენტის პრესსპიკერის, ეკა მიშველაძის თქმით, მარგველაშვილი აღნიშნულს ანექსიისკენ გადადგმულ ნაბიჯად აღიქვამს და საერთაშორისო რეაგირებას ითხოვს:

"გვინდა გამოვეხმაუროთ, რუსეთის ხელისუფლების მიერ ოკუპირებულ რეგიონებში ჩატარებულ რუსეთის დუმის არჩევნებს, სადაც საყურადღებოა ის, რომ საქართველოს ტერიტორიაზე - აფხაზეთსა და ცხინვალის რეგიონში, საარჩევნო უბნები გაიხსნა საქართველოს ხელისუფლების ნებართვის გარეშე. და ასევე, ოკუპირებული ტერიტორიების მოსახლეობამ, მონაწილეობა მიიღო უცხო ქვეყნის საკანონმდებლო ორგანოს არჩევნებში.

ყოველივე ეს, კიდევ ერთხელ, ოკუპირებული ტერიტორიების ანექსიისკენ გადადგმულ ნაბიჯად აღიქმება. პრეზიდენტის აზრით, ყოვლად დაუშვებელია, რომ ამ რეგიონებში მცხოვრები 114 ათასზე მეტი ადამიანი, რუსეთის ფედერაციის სხვადსხვა მხარესა თუ ოლქში, ამომრჩევლის სტატუსით იქნა დარეგისტრირებული."

ოკუპირებულ რეგიონებში რუსული საარჩევნო უბნების გახსნა დაგმო საგარეო საქმეთა სამინისტრომაც.

რუსეთის მიერ 2014 წელს ანექსირებული ყირიმის ტერიტორიაზე არჩევნების ჩატარება დაგმო ევროკავშირმა.

18 სექტემბერს რუსეთში სახელმწიფო დუმის არჩევნები გაიმართა. საარჩევნო უბნები არა მხოლოდ რუსეთის ტერიტორიაზე გაიხსნა, არამედ ოკუპირებულ აფხაზეთსა და სამხრეთ ოსეთის ტერიტორიაზე, კიევში, ოდესასა და ყირიმშიც.

არჩევნებში სახელისუფლებო პარტია - ერთიანმა რუსეთმა 450-დან 300-ზე მეტი ადგილი მოიპოვა.