კომპანიები, რომლებიც საკუთარი 2%-იანი საპენსიო შენატანის გადახდას დასაქმებულს დააკისრებენ და ამ მიზნით მათ ხელფასს შეუმცირებენ, დაჯარიმდებიან. ამის შესახებ საპენსიო სააგენტოს დირექტორმა, ლევან სურგულაძემ ინტერპრესნიუსთან განაცხადა.

მისი ინფორმაციით, თუ მსგავსი დარღვევა მოხდება, კომპანია 500-დან 1 000 ლარამდე დაჯარიმდება. აღსრულება კი შემოსავლების სამსახურის პრეროგატივა იქნება.

"ჯერჯერობით, ჩვენთვის არავის მოუმართავს, რომ დამსაქმებელმა აიძულა მისი წილი საპენსიო შენატანის გადახდა ან რამე მსგავს ფაქტს ჰქონდა ადგილი. თუმცა, თუ მოქალაქე მოგვმართავს, ჩვენ აუცილებლად გვექნება შესაბამისი რეაგირება, რამდენადაც მნიშვნელოვანია, რომ არ შეილახოს დასაქმებულის ინტერესები. დასაქმებულებს ასევე შეუძლიათ სასამართლოს მიმართონ და ამგვარად დაიცვან საკუთარი უფლებები", — თქვა სურგულაძემ.

პენსიის დაგროვების სისტემა 2019 წლის პირველი იანვრიდან ამოქმედდა. სისტემაში სავალდებულო წესით ჩაერთო ყველა დასაქმებული, ხოლო ნებაყოფლობით ნებისმიერი თვითდასაქმებული. კანონპროექტის მიხედვით, სქემაში ჩართვა სავალდებულოა 40 წლამდე პირებისთვის, 40 წლის ზემოთ კი, ნებაყოფლობითი.