უფლებადამცველ ვიტალი საფაროვის მკვლელობის საქმეზე ბრალდებულებს სასამართლოს გადაწყვეტილებით აღკვეთის ღონისძიება არ შეეცვალათ და ისევ პატიმრობაში რჩებიან.

ბრალდებულების, გიორგი სოხაძისა და ავთანდილ კანდელაკიშვილის ადვოკატები შესაბამისად, 1 000 და 10 000 ლარიან გირაოს სანაცვლოდ მათ გათავისუფლებას ითხოვდნენ. პროკურატურის პოზიციით, აღკვეთის ღონისძიების შემსუბუქება არ შეიძლებოდა, რადგან არსებობდა მოწმეზე ზეგავლენის საფრთხე.

ბრალდებულის უფლებადამცველმა პასუხად განაცხადა, რომ ამდენი თვის განმავლობაში დაკავებულებს გავლენა არ მოუხდენიათ არავისზე. პასუხად პროკურორმა თქვა, რომ ზემოქმედება არ ყოფილა, რადგან დაკავებულებს შეზღუდული ჰქონდათ კონტაქტი გარე სამყაროსთან. მოსამართლე ქეთევან ჯაჭვაძემ ბრალდების პოზიცია გაიზიარა.

დაცვის მხარემ განაცხადა, რომ არ არსებობდა დასაბუთებული ბრალი და ამიტომ საქმის შეწყვეტა მოითხოვა, პროკურატურამ კი არსებითი განხილვის გაგრძელება. სასამართლოს გადაწყვეტილებით, არსებითი განხილვა დაინიშნა 24 აპრილს 14 საათზე.

სოხაძესა და კანდელაკიშვილს ბრალი ედებათ ჯგუფურად განზრახ მკვლელობაში ეროვნული შეუწყნარებლობის მოტივით. დანაშაული 13-დან 17-მდე თავისუფლების აღკვეთას ითვალისწინებს. თავდაპირველად, მათ ბრალი წარდგენილი ჰქონდათ განზრახ მკვლელობის მუხლით, თუმცა პროკურატურამ ბრალი დაამძიმა. ამასთან დაკავშირებით დაცვის მხარე აცხადებს, რომ პროკურატურამ გადაწყვეტილება არაკვალიფიციურად მიიღო. ორივე ბრალდებულმა ნაფიც მსაჯულთა სასამართლოზე უარი განაცხადა.

დღეს, 16 აპრილს პროცესის დაწყებამდე სასამართლოს ეზოში მოკლული საფაროვის ოჯახის მხარდასაჭერად აქცია გაიმართა.