ადამიანის უფლებათა კომიტეტის თავმჯდომარე სოფო კილაძე ბიძინა ივანიშვილის მიერ სამების მოხატვის დაფინანსებას გამოეხმაურა და განაცხადა, რომ "უსამართლობაა იმის დაბრალება, თითქოს ყველაფერს წინასაარჩევნოდ აკეთებს". მისი თქმით, ყველამ ზუსტად იცის ვინ ააშენა სამება და ახლა ქართული ოცნების თავმჯდომარე მის სრულად მოხატვას აპირებს. ამის შესახებ კილაძემ ფეისბუქპოსტში ისაუბრა.

კილაძემ მართლმადიდებელი ეკლესიის პატრიარქისა და ქართული ოცნების თავმჯდომარის საერთო ფოტო გააზიარა და დაწერა, რომ ორივეს არაერთი ეკლესია-მონასტერი აქვს აშენებული. მისი თქმით, უხარია ეს შეხვედრები და აუცილებელია გაერთიანება სამშობლოს გასაძლიერებლად.

"დანარჩენს ბრძენი და მრავალჭირნახული ქართველი ერი კარგად განსჯის და დაინახავს", — წერს დეპუტატი.

მართლმადიდებელი ეკლესიის პატრიარქი და ქართული ოცნების თავმჯდომარე ერთმანეთს საპატრიარქოში შეხვდნენ. ბიძინა ივანიშვილმა განაცხადა, რომ მზად არის სამების ეკლესიის მოხატვა სრულად დააფინანსოს.

ბოლო ერთი თვის განმავლობაში ვრცელდება ბიძინა ივანიშვილის სხვადასხვა შეხვედრის ამსახველი ვიდეომასალა, რომელშიც ის დაფინანსების დაპირებებს იძლევა. ვიდეოებს ოფიციალურად ქართული ოცნების პრესსამსახური არ ავრცელებს, ისინი სხვადასხვა გვერდებსა და ექაუნთებზე იტვირთება და უმეტესად ტელეფონით არის გადაღებული.