მთაწმინდის მაჟორიტარი დეპუტატობის კანდიდატი, გიორგი ანდრიაძე განცხადებას გამოეხმაურა, რომლითაც საპატრიარქო გირჩის საპირწონედ შექმნილ მართლმადიდებელ კატაკომბურ ეკლესიას გაემიჯნა. მისი თქმით, აღნიშნული განცხადებით საპატრიარქო მას კია არ გაემიჯნა, პირიქით, მხარი დაუჭირა.

"ისინი ემიჯნებიან ჩემი ბრძოლის პოლიტიკურ მეთოდს, რომელიც არის ხელისუფლებაზე ზეწოლა. იმ განცხადებაში წერია, რომ უნდა დაიხვეწოს ჯარში გაწვევის სისტემა, გირჩის ორგანიზაცია უნდა გაუქმდეს. რასაც მოვითხოვ, იმას მოითხოვენ ისინი. ემიჯნებიან ჩემი ზეწოლის მეთოდს", — განმარტა გიორგი ანდრიაძემ.

მაჟორიტარი დეპუტატის კანდიდატმა 10 აპრილის პრესკონფერენციაზე განაცხადა, რომ ბიბლიური თავისუფლების გასაუქმებლად სასამართლოს მიმართავს. მისი მტკიცებით, ორგანიზაცია უკანონოდ შეიქმნა, რადგან არის გამოგონილი და შარლატანური.

პირველ აპრილს გიორგი ანდრიაძემ განაცხადა, რომ გირჩის ალტერნატივად მართლმადიდებლური ორგანიზაცია შეიქმნა, რომელიც ახალგაზრდებს ჯარისგან გაათავისუფლებს. მისი განმარტებით, ეს ორგანიზაცია თურქეთში არსებულ, ისტორიულად ჩამოყალიბებულ კატაკომბურ ეკლესიას წარმოადგენს, რომელიც თავისი მრწამსით მართლმადიდებლური ორგანიზაციაა.

აღნიშნულთან დაკავშირებით საპატრიარქომ განაცხადა, რომ გიორგი ანდრიაძემ განუმარტა მათ, რომ ეს მისი პოლიტიკური ხედვაა და არაა მათთან დაკავშირებული.

"კატაკომბურ ეკლესიასთან დაკავშირებით გიორგი ანდრიაძემ განგვიმარტა, რომ პირადად იგი არ არის მისი არც დამფუძნებელი და არც წევრი, მაგრამ მიაჩნია, რომ ეს ფაქტი ხელს შეუწყობს, გირჩის ბიბლიური თავისუფლების და ჯარში გაწვევასთან დაკავშირებით ქვეყანაში არსებული კანონის მანკიერი მხარის გაუქმებას", — ვკითხულობთ განცხადებაში.

საპატრიარქოს მიაჩნია, რომ რელიგიურ ორგანიზაციად დარეგისტრირების წესში აუცილებლად უნდა შევიდეს ცვლილება:

"რათა არც ორგანიზაცია გირჩს, რომლის ქმედებაც მიმართულია ეკლესიის, სახელმწიფოს და, საერთოდ, საზოგადოების წინააღმდეგ და არც სხვა რომელიმე გაერთიანებას არ მიეცეს საშუალება, ისარგებლონ კანონში არსებული ლაფსუსით და ეს თავისი ვიწრო ინტერესებისთვის გამოიყენონ".