საქართველოს მართლმადიდებელი ეკლესიის საპატრიარქო ემიჯნება გირჩის რელიგიური ორგანიზაციის საპირწონედ შექმნილ კატაკომბურ მართლმადიდებელ ეკლესიას. ამ შინაარსის განცხადება საპატრიარქომ გაავრცელა.

საპატრიარქოს ცნობით, გიორგი ანდრიაძემ, რომელმაც ამ ორგანიზაციის მიზნებზე ისაუბრა, მათ განუცხადა, რომ ეს მისი პოლიტიკური ხედვაა და არაა მათთან დაკავშირებული.

"კატაკომბურ ეკლესიასთან დაკავშირებით გიორგი ანდრიაძემ განგვიმარტა, რომ პირადად იგი არ არის მისი არც დამფუძნებული და არც წევრი, მაგრამ მიაჩნია, რომ ეს ფაქტი ხელს შეუწყობს ,გირჩის ბიბლიური თავისუფლების და ჯარში გაწვევასთან დაკავშირებით ქვეყანაში არსებული კანონის მანკიერი მხარის გაუქმებას", — ვკითხულობთ განცხადებაში.

საპატრიარქოს მიაჩნია, რომ რელიგიურ ორგანიზაციად დარეგისტრირების წესში აუცილებლად უნდა შევიდეს ცვლილება:

"რათა არც ორგანიზაცია გირჩს, რომლის ქმედებაც მიმართულია ეკლესიის, სახელმწიფოს და, საერთოდ, საზოგადოების წინააღმდეგ და არც სხვა რომელიმე გაერთიანებას არ მიეცეს საშუალება, ისარგებლონ კანონში არსებული ლაფსუსით და ეს თავისი ვიწრო ინტერესებისთვის გამოიყენონ".

პირველ აპრილს მთაწმინდის მაჟორიტარი დეპუტატობის კანდიდატმა, გიორგი ანდრიაძემ განაცხადა, რომ გირჩის ალტერნატივად მართლმადიდებლური ორგანიზაცია შეიქმნა, რომელიც ახალგაზრდებს ჯარისგან გაათავისუფლებს. ამ ორგანიზაციამ ორი ადამიანი ჯარიდან უკვე იხსნა.