სასოწარკვეთილი დიასახლისების ვარსკვლავის ფელისიტი ჰოფმანი კოლეჯის თანამშრომლების მოსყიდვის საქმეზე ბრალს აღიარებს.

56 წლის მსახიობი სასამართლოზე აღიარებით წარსდგა.

"სრულიად ვიღებ ამ პასუხისმგებლობას და ძალიან მრცხვენია. მრცხვენია და ვნანობ იმას, რაც გავაკეთე. მრცხვენია იმის, თუ რა ზიანი მივაყენე ჩემს შვილს, ოჯახს, მეგობრებს, კოლეგებსა და საგანმანათლებლო სისტემას. მინდა დიდი ბოდიში მოვუხადო იმ სტუდენტებს, რომლებიც დაუღალავად შრომობენ იმისთვის, რომ კოლეჯში ჩააბარონ, ასევე მათ მშობლებს, რომლებიც ყველაფერს აკეთებენ თავიანთი შვილების მხარდასაჭერად", - თქვა ფელისიტი ჰოფმანმა.

მან დასძინა, რომ მისმა შვილმა ქრთამის გადახდის შესახებ არაფერი იცოდა.

შეგახსენებთ, რომ მასაჩუსეტსის პროკურატურამ ჰოფმანსა და სხვა 50 ადამიანს ბრალი პრესტიჟული სასწავლებლების თანამშრომლების მოსყიდვის საქმეში წაუყენა.

ჰოფმანი და სხვა ბრალდებულები რეიტინგული სკოლებისა და კოლეჯის თანამშრომლებს ქრთამის სახით რამდენიმე ათასს უხდიდნენ, საბოლოოდ კი მათი შვილების ტესტირების შედეგები სწორდებოდა და ჩარიცხვის დასტურიც მოსდიოდათ.

საქმეში ფიგურირებენ იელის, სტენფორდის, ჯორჯთაუნისა და სხვა რეიტინგული უნივერსიტეტების ის თანამშრომლები, რომლებიც პასუხისმგებელნი არიან ტესტირების შედეგებზე.

პროკურატურის ცნობით, სქემა 2011 წლიდან მუშაობდა და მასში ცნობილი მსახიობები, დიზაინერები, ბიზნესმენები და სხვა გავლენიანი პირების ბრალეულობა იკვეთება. რაც შეეხება ფელისიტის, გამოძიების ინფორმაციით, მან $15 ათასი გადაიხადა იმისთვის, რომ მისი შვილის შედეგები გასწორებულიყო.

მათივე თქმით, სქემა კი ასე მოქმედებდა - ჰოფმანი არარსებული საქველმოქმედო ორგანიზაციის ანგარიშზე იმ თანხას რიცხავდა, რომელსაც ეუბნებოდნენ, საბოლოოდ კი მისი შვილი გამოცდებს წარმატებით ჩააბარებდა.

როგორც FBI-ის აგენტი, ჯოზეფ ბონავოლონტა ამბობს, მშობლები $200 ათასიდან $6,5 მილიონამდე ხარჯავდნენ იმისთვის, რომ სასურველი შედეგი მიეღოთ.